Гьикьван инсан марифатлуди хьайитIа, гьакьван ам Ватандиз вафалуни жеда.

А.С.Грибоедов

Жува хкягъай, рикI алай кеспидай уьмуьрдин макьсад, руьгьдин таъминвал жагъунилай, белки, инсандиз еке бахт авач жеди. Ахьтинбурун жергедай яз, вичин вири уьмуьр акьалтзавай несилдиз чирвилер ва тербия гунин четин, амма баркаллу кардиз бахшнавай КIвар–чагърин  юкьван школадин сифтегьан классрин муаллим ва пионер­вожатыйвиле кIвалах авур  Манафова  Бесен  Вердихановнадин  тIварни кьаз жеда.

1948-йисуз Хив райондин КьванцIила зегьметчи, гьуьрметлу хизанда дидедиз хьайи руша школада амаз вичин рикI алай муаллимвилин пешедикай фикирардай. И мурад кьилиз акъудун патал ада Дербентдин педучилище агал­кьунралди акьалтIарна. КIвар­чагърин хуьруьн школада гъвечIи классрин муаллим ва гзаф  вахтара пионервожатый яз кIвалахна. Ада тарсар гайибурукай къе муаллимар ва  ма­са пешейрин сагьибар хьанва…

Зегьметдин ветеран Бесен Манафовади алай вахтунда, Хушетда 6-нумрадин школада гъвечIи классриз урус чIалан тарсар гуз, кIвалах давамарзава. Адан гьакъи­сагъ зегьмет профсоюздин тешкилатрин патай грамотайралди ва ма­са багьа пишкешралди къейд­нава. КIвалахай педколлективра ва ди­де-бубайрин патай адаз еке гьуьр­мет ава. Акьалтзавай несилдиз чир­вилер ва тербия гунин четин кардиз бахшнавай вичин уьмуьрдилай ам рази я.

Тамам 30 йисуз сифтегьан клас­срин аялриз тарсар гун гьи­кьван четин ятIа, и пешедай кIва­лах­за­вай­буруз хъсандиз чида. Бесен Манафова вичин везифайрив яратмишунин тегьерда эгечIзава. Муаллимди, куьлуь-шуьлуьярни кваз фи­кир­­да кьуна, туькIуьрнавай пландин бинедаллаз, аквадай по­со­би­ярни ишлемишиз, чешнелудаказ ту­хузвай тарсар вилик эцигнавай макьсадрив агакьзава. Школадиз фейи сифте йикъалай Бесен Ма­нафова гележегдин несилдик чIехи Ватан, багъри ерияр кIан хьунин, кIелунрив ва зегьметдив рикI гваз эгечIунин, жуван къуватрихъ инанмишвал авунин гьиссер кутаз алахъ­­­­зава. Секинсуз рикI авай ам школада аялар патал хийирлу гзаф крарин яцIа жезва. Бесен муаллимди КIварчагърин школада зегьмет чIугвадайла, заз чизвайвал, художественный самодеятельностин кIвалах хъсанаруникни еке пай кутазвай. Музыкадал, ма­нийрал, искусстводал адан гзаф рикI алай. Культурадин кIвале ­тухузвай гуьруьшрал, мярекатрал тебрикдин келимаяр гваз пионерар акъуддай.

Уьмуьрдин юлдаш Абдурагьманахъ галаз санал веледарни намуслу, Ватандиз вафалу инсанар яз чIехи авунин жигьетдайни еке зегьмет чIугуна. ЧIехи гада Алика, Махачкъалада автодорожный институтда кIелна, шегьерда ЖКХ-да,  Сережади, финансрин институт куь­тягьна, центральный банкда кIва­лахзава. Руш Светланади — ДГУ-дин филологиядин факультет, гъве­­чIи руша финансрин техникум акьалтIарна. Веледрихъ чпин хизанар, кIвал-югъ хьанва. ЧIехи дидедиз 14 хтул ва 1 птул багъишнава.

— Гьар са аялдиз хъсан чирвилер гуз алахъунилай гъейри, зун абурукай акьуллу, Ватандиз, хуьруьз, хизандиз вафалу инсанар хкатун патални чалишмиш жезва, — лугьузва Бесен муаллимди. — Чи гележег тир  аялрикай хъсан пешекарар, камаллу инсанар хкатун зи кьилин мурад я.

Зейнуллагь  Наврузов,

КIварчагърин хуьр