Кьурагьрин ясли-бахчайра кIвалахдин девлетлу тежриба авай, чпин везифайрив намуслувилелди эгечIзавай, аялриз чеб диде хьиз кIанариз алакьнавай тербиячияр тIимил авач. “Солнышко” тIвар алай ясли-бахчада зегьмет чIугвазвай тербиячи Къизил Къурбанова гьа ихьтинбурун жергедай я.
1976-йисуз Кьурагьрин 1-нумрадин юкьван школа куьтягьайдалай гуьгъуьниз ам Дербентдин педучилищедик экечIна. 1979-йисуз анаг агалкьунралди куьтягьна. 2 йисуз вичи чирвал къачур школада пионервожатый хьана. 1982-йисалай аялрин бахчада тербиячи я. Алай вахтунда ам вичи кIвалахзавай аялрин бахчада лап хъсан тербиячийрикай сад яз гьисабзава. Адан группада 3 йисалай 6 йисал къведалди яшда авай 18 аял ава. ГъвечIи аялдин кьатIунар, адаз амал чир жедалди, михьи чарчиз, рикIни гуьзгуьдиз ухшар я. Гьавиляй ам мергьяматлувилин, гьуьрметлувилин, мукьва-кьили, зегьмет, ватан, халкь кIан хьунин гьиссер кутуналди тербияламишна кIанда. Аялриз гузвай тербиядилай абурун гележегдин уьмуьрдин рехъни хейлин дережада аслу я. Абур гьи карда хьайитIани чIехибурулай чешне къачуз гьавалат жеда. Къ.Къурбановади абуруз гьарфар кхьиз, шикилар чIугваз, пластилиндикай гьар жуьредин шейэр туькIуьриз, гъвечIи шиирар хуралай кIелиз чирзава. Ада аялар къугъунал желбунизни еке фикир гузва. Аялриз ам чпин диде хьиз кIанда.
Адан группада авай аялри ЦIийи йисаз, 8-Мартдиз талукь ва маса мярекатра активвилелди иштиракзава.
— Къ.Къурбановадикай завай анжах разивилин келимаяр лугьуз жеда. Вичин хиве авай везифайрив ам намуслувилелди эгечIзава. Адаз коллективда гьуьрмет, авторитет ава, ам ада вичин секин, хъуьтуьл къилихдалди къазанмишна. Виридан дердиникай хабар кьадай, акьалтIай хъсан инсан я, — лугьузва и ясли-бахчадин заведующий Фаина Амрагьовади.
Къ.Къурбановади аялрин диде-бубайрихъ галаз сих алакъаяр хуьзва, абурун иштираквал аваз собранияр кьиле тухузва. Аялрал рикI алай тербиячи абурун патав гьерекатиз аквада.
Къуй Къизил Къурбанова хьтин аялрин къайгъударар чахъ гзаф хьурай!
М.Агьмедова
