Мегьарамдхуьруьн районда мектебда кIелдай вахтунилай вилик квай яшдин аялар патал образованидин идарадин цIийи дарамат эцигунив эгечIнава. Идакай «Лезги газетдиз» муниципалитетдин администрациядин информациядин центрадин инстаграмда авай чини хабар гана.
60 аялдиз чка жедай бахчадин дарамат эцигунин кIвалахар «СК Армада» пудратчивилин тешкилатди кьиле тухузва. Чешмеди къейдзавайвал, райондин кьил Фарид Агьмедова районда яшайишдин рекьяй метлеб авай дараматар эцигунин месэладиз кьилин фикир гузва. Объект РД-дин Кьили теклифнавай республикадин гегьенш программадин сергьятра аваз эцигзава. Ихьтин дараматар эцигунал РФ-дин оборонадин министерстводин къуватарни желбнава. Проектдал асаслу яз, Мегьарамдхуьруьн районда эцигзавай дарамат алай йисан эхирда акьалтIарун лазим я.
«Лезги газет»
