Мумкин кар я, гишин хьунни рекьера.

Галат хьунни, четин хьунни рекьера.

Мумкин кар я, дуст къакъатун, алатун,

Хабарсуз кIвач чалпачухдиз аватун.

 

Мумкин кар я, кьил элкъуьрна шейтIанри,

Къуьр къалурун фири къалин аслан хьиз.

Чит къалурун халис михьи хара хьиз,

Са жизвини кьадардилай пара хьиз…

 

Вири хьунухь мумкин я, са таб жедач —

Ватандин тахт шит къафундин къаб жедач.

Ада чIугваз жеда, чIиж хьиз ширеди,

Вири мекьер кIватI хьайитIан дередиз.

 

Мумкин кар туш, виждан авай инсанди

Хаинвалдач вичин хайи Ватандиз.

Мумкин кар туш, дидед хурал хер авур

Хциз гъейри касди рикIяй хъвер авун.

 

Дин авачиз, иман хьунни мумкин туш.

Имансузрихъ аман хьунни мумкин туш.

Ирид чалма алукIайтIан келлейрал,

Имамвилин тIвар къачуз жеч гуьллейралд.

 

ТIегъуьн галаз атайди вич тIегъуьнди

Яда эхир, гьа вичиз сур эгъуьнда.

Мумкин кар туш, зи дагъларин азадвал

Къакъудиз хьун ватансузрин къазадвай.

 

Ватан хуьзвай гьар са хва вич эбеди

Хуьзвайди я дидед хурун некIеди.

Мумкин кар туш, дидедин нек ужуз хьун,

Диде хуьрди душманд вилик ажуз хьун…

 

Ажуз жедач зи дагъвияр-багърияр!..

* * *

Душманрин къаст гьакьван бетер,

ЧIуру тир кьван!

Намусдикай, вири квахьна,

Амайди са чуру тир кьван.

Инсанвилиз, игьсанвилиз айру тир кьван.

Чин чIулавна, амайди са чуру тир кьван…

 

Бес инсанриз гьакьван чIулав савашдани?

Цуьквер таза, ялавра тваз, кармашдани?

Аллагьни кваз бейтереф яз  тамашдани?

Акьулдикай затI амачиз, кIамашдани?..

1999-йис. Сентябрь.

Мерд АЛИ