И йикъара Дагъустандин УФСИН-да, «Бубадихъ (дидедихъ) галаз са югъ кIвалахал» лишандик кваз серенжем кьиле тухвана. ИкI, УИС-дин (уголовно-исполнительная система) идарайра зегьмет чIугвазвай къуллугъчийрихъ галаз са юкъуз абурун аяларни иниз мугьман хьана, абур (чпин бубадин ва я дидедин) кIвалахдихъ галаз танишарна. Идакай чаз идарадин пресс-къуллугъди хабар гана.

Россиядин Президентди цIи малумарнавай Хизандин йисан сергьятра аваз тешкилнавай и серенжемдиз УИС-дин идарайрин къуллугъчийри кьетIен гьазурвал акунвай. Аялар патал и къурулушдин идарайра сиягьат кьиле тухвана, УИС-дин тарихдикай ва государстводин жавабдар къуллугъдикай суьгьбетна. Аялри абурун суьгьбетрихъ дикъетдивди яб акална.

Гуьгъуьнлай мугьманар патал ачухнавай суфрадихъ суьгьбет давам хьана. Аялрини чпин фикирар лагьана. Бубадихъни дидедихъ галаз кIвалахал атанвай са гадади къейд авурвал, адаз вичин багърийрин кIвалах жавабдарди тирди икьван гагьдини чизвай. Амма гила, абурун везифайрив мукьувай таниш хьайила, вичи абурал мадни дамахдайдакай лагьана.

Дугъриданни, хизан мягькем ва хизандин членрин арада гьуьрмет, аялар бубадинни дидедин кIвалахдин важиблувилин гъавурда хьунал гьалтайла, ихьтин серенжемар хийирлу я.

Чи мухбир