Студентвал — им жегьил инсандин уьмуьр­да виридалайни экуь ва гуьзел вахт, кlелиз экечlай гьам вуз хьуй, гьам колледж — студентриз мумкинвилер ачухдай майдан я. Анра, пеше къачунихъ галаз сад хьиз, илимдал, ахтармишунрал, волонтервилел, яратмишунрал машгъул жедай шартlарни ава. Кlанзавайди гьар са кардив рикl гваз эгечIун я.  

Къе чи суьгьбетдин игит рикl эцигна кlел­­за­вай студентрикай сад я. Эседуллаев Асеф Айвазович 2000- йисуз Мегьарамдхуьруьн райондин­ Билбил-Къазмайрал дидедиз хьана. Вад йи­са авайла, ам бедбахтвилин дуьшуьшдик акатна. Сагъламвал рикlиз кlан­дай­вал мягькемар хъийиз хьанач. Ам III дере­жа­дин инвалид я. Хуьруьн школада­ 9-класс акьалтlарна, ам Махачкъалада Р. Ашуралиеван тlвар­цIихъ га­лай техколледждин «Программирование»­ отде­ленидиз компью­террин къурулушриз прог­­раммаяр­ гьазурдай пешедай кlелиз гьахь­на. 2020-йисуз чешнелудаказ колледж акьал­тlарна. Са йисни зура и колледждин вычислительный центрада заведующийвиле кlвалахна. Кlва­лахдивай къерех тахьана, ада 2020-2022-йисара ДГУ-да информатикадайни рекъемрин технологиядай бакалавриатда кlелна. Алай вахтунда ада и вуздин информатикадайни рекъемрин технологиядай магистратурада вичин чирвилерин дережа мадни хкажзава.

Колледждин 1 ва 2-курсара кlел­дай­ла­, А.Эседуллаева  яваш-яваш сайтар туь­кIуьриз чирна. Вичин чирвилерихъ инанмиш хьайила, ада, 3-курсунилай гатlунна, конкурсра, чемпионатра иштиракиз хьана.

Колледжда 4-курсуна кlелзавай 2019-йисуз ада сагъламвилин мумкин­вилер сергьятламиш хьанвай инсанрин арада пешекарвилин устадвиляй Дагъустанда кьиле фейи «Абилимпикс-2019» региондин lll чемпионатда­ «Веб-дизайн» пешедай иштиракна. Чемпионатдин нетижада вичи 1-чка кьунва лагьана малумарайла, са легьзеда ам чlалахъ хьанач, ахпа шадвал акатна, ам вичи хкянавай рекьихъ мадни инанмиш хьана. Гила ада кIелунин программайра авай материалдилай гъейри, алавабурни дериндай чириз гатlунна.

2020-йисуз Асефа республикадин пеше­карвилин образованидин организацийрин ба­зайра кьиле фейи сагъламвилин мумкин­вилер сергьятламиш хьанвай инсанрин арада пешекарвилин устадвиляй «Абилимпикс-2020» ре­гиондин lV чемпионатда, «Веб-ди­зайн» пешедай  Дагъустандин хкягъай­ командадик кваз иштиракна. Винидихъ къейднавайвал, а чIавуз ДГУ-да информатикадай­ни рекъемрин технологиядай 2-курсуна кlел­завай Эседуллаев Асеф Айвазович 1-дережайрин дипломдиз ва медалдиз лайихлу хьана. «Визаж-Холл» тешкилатдин дестеди чпин патай адаз пишкешдин сертификат гана.

2020-йисуз Асефа ДГУ-да алава пешекарвилин программадай кlелунар давамар хъувуна.

2021-йисуз международный 10-чем­пионатдин сергьятра аваз Россияда «Абилимпиксдин» тешкилатчийри и чемпионат­ра вилик квай йисара гъалибвилер ва приз­дин чкаяр кьурбуруз ял ягъунин милли кlватl хьунар тешкилна. И серенжемда иштиракун патал Асеф Эседуллаевазни тек­лифнавай.

2021-йисуз милли «Образование» проектдик квай «Жегьил пешекарар» федеральный проектдин сергьятра аваз коммерциядинди тушир международный «Ворлдскилс» гьерекатдин къайдайралди пешекарвилин устадвиляй тухузвай акъажунра 55 пешедай 350 касди иштиракна. Ана А.Эседуллаев «Веб-дизайн ва разработка» пешедай эксперт лагьай тlварцlизни дипломдиз лайихлу хьана. 2022-йисуз ада винидихъ тlвар кьунвай акъажунра «Веб-технология» пешедай иштиракна, эксперт лагьай тlварни диплом къачуна.

Алай йисан 24-28-майдиз спортдин прог­раммаяр туькlуьрунин Федерацияди «Код мира» лишандик кваз Чечняда кьиле тухвай спортдин программаяр туькlуьрдай международный фестивалда Асеф Эседуллаева Дагъустандин командадик кваз иштиракна.

— И фестивалда, — рикlел хкизва чи ватан­эгьлиди, — Дагъустандин хкягъай­ командадик за кlелзавай информатикадинни ре­къемрин технологиядин факультетдай пуд кас кутунвай: зун, Мегьамед Рашидов ва Теймураз Исаев. Пуд юкъуз давам хьайи и акъажунра­ Москвадин, Санкт-Петербургдин Рос­сиядин регионрай 23 командади, гьакl­ни Белоруссиядин, Кубадин, Къазахстандин, Омандин, Кьиблепатан Осетиядин, Палес­тинадин, Египетдин командайри, санлай къачурла, 300 касди иштиракна. Акъажунар «Алгоритмическое программирование» ва «Продуктовое программирование» номинацийрай тухвана. Фестивалдин пишкешрин фонд 3 500 000 манатдикай ибарат тир.

Шад жедай кlвалах ам я хьи, икьван командайрин арада «Продуктовое программирование» номинациядай чи командани приздин чкадиз лайихлу хьана. ИкI, Грозныйдин (128 б.) — 1, Воронеждин (118 б.) — 2 ва Дагъустандинни (117 б.) Татарстандин (114 б.) командайри 3-чкаяр кьуна.

Анал рахай ДГУ-дин ректор Муртузали Рабаданова къейд авурвал, дуьньяда прог­раммирование спортдин жуьре яз официальнидаказ  кьабулнавай сад лагьай уьлкве Россия я. «Код мира» фестивалди гележегда компьютеррин рекьяй бажарагълубурун арадай мадни хъсанбур винел акъуддай мумкинвал гузва.

Чна Асефаз къазанмишнавай агалкьунар мубарак авуналди, викlегь­ви­ляй, гъалибвилихъ ялунай, агалкьун­рихъ агъунай сагърай лугьузва. Мадни лугьуз кIанзава: къазанмишнавай­ агалкьунрал акъвазмир – кlела, цlийиви­лерихъ вач, Асеф!

Къагьриман  Ибрагьимов