25-августдиз Кьурагь районда РД-дин карчивилинни инвестицийрин рекьяй Агентстводин руково-дителдин заместитель Мегьамед Мусаева агьалияр кьабулна. Мярекатда райондин кьил Замир Азизова, адан заместитель Махач Хариева, администрациядин аппаратдин руководитель Фикрет Медетова, Общественный палатадин председатель Фахрудин Мирзоева ва жавабдар маса къуллугъчийри иштиракна.
Шимихуьруьн агъсакъалрин советдин председатель Багьаудин Багьаудинова ва хуьруьн администрациядин кьил Хийирбег Гьасретова хабар гайивал, Шимихуьр, райондин дагълух зонада авай мад 11 хуьр хьиз, тIебии газдалди таъминарнавач. Рекьерни пис гьалда ава. Марфар къвайила, генани чIур жезва. ДатIана рехъ къайдадик кваз хуьн патал са бульдозер кьванни къачуна кIанзава. И рекьера къир цадай вахт фадлай алукьнава. Электрикдин симерни аварийный гьалда ава. Мукьвал-мукьвал эквер хкатун себеб яз, жемятдин кIвалера авай электроприборар чIур жезва. Арза-ферзе, тIалабунар гзаф ийизватIани, линияр капитальнидаказ ремонтзавач.
Райондин хуьруьн майишатдин кар алай хилерик малдарвални хипехъанвал акатзава. Гзаф районэгьлийри маларни хипер хуьзва, амма як, некIедин продукция маса гуз жезвач, кIевера гьатзава. Зирзибил тухудай са машин кьванни авачирвиляй хуьрер хъуртариз элкъвезва. Чкадал кIвалахдай къулай шартIар авачирвиляй жегьилар патал физва, хуьрер-кIвалер яваш-яваш ичIи жезва. “И месэлайрикай чна гьеле 2016-йисуз РД-дин промышленностдинни транспортдин министрдин заместитель Александр Гальмуковахъ галаз кьиле фейи гуьруьшдални хабар ганай. Амма чи суалар жавабар авачиз амукьна. Чна квевай районда як гьялдай комбинат эцигунин, 11 хуьр патал зирзибил тухудай са улакьни бульдозер маса къачунин карда куьмекун тIалабзава”, — лагьана абуру.
— Куьне къе идара авунин кьенерарни пулдин вири такьатар государстводин гъиле авай Советрин гьукумдин девирда вилик эцигдай хьтин месэлаяр къарагъарнава, — лагьана М.Мусаева. — Чи йикъара ихьтин мумкинвилер кьилдин ксарив вахканва. Куьне къейднавай месэлаяр гьялунин кардал чпихъ мумкинвилер авай спонсорар желбна кIанда. Дагъустандани Ингушетияда “Газпромдин” вилик еке буржар арадал атанва. Гьавиляй хуьрериз газ атун вад йисан къене михьиз рикIелай алудайтIани жеда.
Зирзибил кIватIун, ам хуьрерин сергьятрилай къецепата авай хъуртарал гадарун чкайрин муниципалитетрин хиве тунва. ГьакI хьайила, зирзибил тухудай улакьни бульдозер, агьалийривай налогар кIватIна, гьа такьатрихъ къачуртIа хъсан я. Электрикдин симерни рехъ ремонт авунин карда чна квез куьмекда. Куь тIалабунар чна РД-дин Гьукуматдиз гьазурдай махсус чарчени къейдда, — хиве кьуна М.Мусаева.
Гуьгъуьнлай Усугърин, Ашарин хуьрерин кьилер тир Жавид Къурбановани Али Алиева ва Ашарин юкьван школадин директор Эмируллагь Будайчиева Мегьамед Мусаеваз чпин дердийрикай лагьана. Абуру къейд авурвал, мукьвал-мукьвал эквер хкатуникди мекьи вахтунда котельнияр хъиткьин тавун патал школадин, ясли-бахчадин ва маса идарайрин пардал чими ийидай къурулушра яд къекъуьрдай насосар хкуднамазди, тади гьалда пичера авай кузвай цIивинар акъудна гадаруниз мажбур жезва. Эгер кочегарар, экв хкахьайла, чкадал тахьайтIа, са шакни алачиз, котельнияр хъиткьинда, идарайриз генани чIехи зиянар жеда.
— Ашарин юкьван школа РД-дин Кьилин везифаяр вахтуналди тамамарзавай Владимир Васильеван теклифдалди арадал гъанвай “100 школа” проектдик кутунва, амма ремонт авун патал такьатар къени агакьнавач. Ремонтдин кIвалахар мад энгел жезва. Къе-пака 1-сентябрни алукьда. Бес чна вуч ийида? — суал гана Ашарин юкьван школадин директорди.
— 2016-йисуз са гьихьтин ятIани шаклу фирмади, 8 млн. манат пул харжна, республикадин метлеб авай «Кьурагь-Гельхен» рехъ ремонтна. Амма ремонтдилай кьулухъ и рехъ ва Куквазринни Ашарин арада авай муьгъ авай гьал генани чIур хьана. Кьиле тухвай кIвалахрин еридал садани гуьзчивалнач. Са шумуд миллион манат пул са хийирни авачиз харжна лагьайтIа жеда. Гила рехъ грейдердалди дуьзар хъийиз алахъайла, къванер винел акьалтиз, улакьрин гьерекатдиз манийвал гузва. Муьгъни татугай гьалда ава, — лагьана Усугърин хуьруьн кьили
Мегьамед Мусаева къарагъарнавай вири месэлайрикай республикадин кьиле авайбуруз хабар гудайди къейдна.
Замир Азизова арзачияр кьабулайдалай кьулухъ М.Мусаеван вилик райондин агьалийрин уьмуьрдин шартIарин ери хкажунин жигьетдай алай йисуз ва гележегда тамамарна кIанзавай са шумуд месэла эцигна ва абурукай РД-дин Гьукуматдизни хабар авун тIалабна. Ада гьакIни районэгьлийрин дуланажагъдин шартIарай кьил акъудиз атанвай мугьмандиз ва республикадин регьберриз райондин руководстводин ва вири жемятдин патай сагърай лагьана.
Фахрудин Мирзоев
