Дагъустандин здравоохраненидин министерстводин пресс-къуллугъди раижзавай делилрал асаслу яз, республикадин агьалийрин умуми кьадардин 31% (527185 кас) коронавирусдиз акси рапар янава.
Исятда вири уьлкведа хьиз, Дагъустандани 7-ноябрдалди кIвалах тийидай йикъар малумарнава. Амма яшайишдин метлеб авай са жерге идарайри кIвалах акъвазарнавач. Абурун арада медицинадин идараярни ава. Азарханаяр хьиз, тIегъуьндиз акси рапар ядай пунктарни (87 — стационардин, 59 — мобильный) ахъа я. КIвалах тийизвай йикъара ашкъи авай гьар садавай чеб яшамиш жезвай чкада кардик кутунвай пунктуна коронавирусдиз акси раб ягъиз жеда.
“Новости” РИА-ди хабар гузвайвал, Дагъустанда тIугъвалдин нубатдин лепедин вилик пад кьун патал кьабулнавай алава серенжемар себеб яз, коронавирусдиз акси рапар язавайбурун кьадар артух хьанва. РикIел хкин, мукьвара РФ-дин Гьукуматдин Председатель Михаил Мишустинан регьбервилик кваз кьиле фейи са совещанидал къейд авурвал, Дагъустан тIегъуьндиз акси рапар ягъунин жигьетдай гуьгъуьна амай регионрик акатнава. И сиягьда гьакIни Ростовдин ва Кемероводин областар, Коми, Кеферпатан Осетия ава.
Алатай нумрадай чна хабар гайивал, 28-октябрдилай республикада кафейризни ресторанриз, алишверишдин центрайриз, чIехи туьквенриз, театрриз ва гзаф кьадар инсанар санал кIватI жезвай маса чкайриз фин патал QR-код къалурун шартI я. Ихьтин кодар лагьайтIа, анжах коронавирусдиз акси рапар янавайбуруз гузва.
РикIел хуьх: тIегъуьндикай жув ва жуван хизан хуьнин карда виридалайни менфятлу рехъ фендигар уьзуьрдиз акси раб ягъун я.
Чи мухбир
