Дагъустандин халкьдин шаир Расул Гьамзатован шиирар, поэмаяр ва литературадин маса эсерар дуьньядин халкьарин гзаф чIалариз таржума авунва. Къенин макъалада заз адан эсерар арабрин уьлквейра машгьур хьуникай суьгьбет ийиз кIанзава.
Сифтебурукай яз Расул Гьамзатован шиирар араб чIалаз Египетдин литератор Абдуррагьман аль-Хамисиди таржума авуна. Гуьгъуьнлай Абдуррагьман аль-Хамисидин гада Агьмад аль-Хамисиди Расул Гьамзатовакай «Ауракун Русиййа» («Российские страницы») ктаб акъудна.
Араб халкьдин арада Расул Гьамзатов ва адан эсерар машгьур авурбурукай сад Сириядай тир таржумачи ва доктор Ибрагьим Истанбули я. Ада Дагъустандин халкьдин шаирдин са шумуд ктаб акъудна: «Расул Гамзатов – поэт-человек» (Дамаск, 2004-йис), «Берегите друзей» (Саудовская Аравия, 2002-йис)… Арабрин уьлквейра Ибрагьим Истанбули Расул Гьамзатован эсерар араб чIалаз таржума авур виридалайни хъсан таржумачи яз гьисабзава.
Сириядин писатель Шахир Агьмад Насрди Расул Гьамзатован «Из последних стихов Расула Гамзатова» ктаб араб чIалаз таржума авуна, 2014-йисуз Дамаскда «Дар ас-суан» издательствода чапдай акъудна.
Сириядин таржумачи ва журналист Массух Убуд Массуха 2010-йисуз Дамаскда ва 2022-йисуз Амманда Расул Гьамзатован шииррин ктабар араб чIалал акъудна.
Арабрин уьлквейра Расул Гьамзатован «Зи Дагъустан» ктаб иллаки машгьур я. Арабри «аль-китаб аль-халид» («рекьин тийидай ктаб») лугьузвай и ктаб Ливанда (1979, 1982, 2014 ва 2016-йисара), Сирияда (1984 ва 2015-йисара) чапдай акъудна. И ктаб Сириядин писателар тир Абд аль-Муьина (1917-2006) ва Юсуф аль-Халлака (1937-2007) араб чIалаз таржума авуна.
Расул Гьамзатован ктабар ва эсерар араб чIалаз таржума авурбурукай яз мадни литераторар тир Субгьи аль-Фагьмавидин, Ашраф ас-Саббаган, Макарим аль-Гамридин, Али Акла Арсанан, Ханна Минан, Хайри аль-Мансуран, Джихад Фазилан, Юсуф Халлакан ва гзаф масабурун тIварар кьаз жеда.
Арабрин уьлквейра Расул Гьамзатован 100 йисан юбилейдиз талукьарна шииратдин межлисар, кIелзавайбурун конференцияр ва маса мярекатар кьиле тухузва, телевиденидай передачаяр гузва, газетриз макъалаяр акъатзава. ИкI, мисал яз, Египетдин «Аддиван аль-джадид» газетдиз мукьвара Каирдин «Айн-аш-шамс» университетдин лингвистикадин факультетдин урус чIалан кафедрадин заведующий Мугьаммад Насреддин аль-Джабалиди Расул Гьамзатован уьмуьрдин ва яратмишунрин рекьерикай кхьенвай очерк акъатна.
Эхь, Расул Гьамзатов вири дуьньяда машгьур я. И кардал чна – дагъустанвийри – дамахзава.
Хазран Кьасумов
