И йикъара Сербиядин Белградда кьуршахар кьунай (иник азаддаказ, грекринни римлуйрин жуьреда ва дишегьлийри кьуршахар кьун акатзава) 23 йисал къведалди яшара авай жегьилрин арада дуьньядин кIвенкIвечивал патал акъажунар кьиле фена. Россиядин хкянавай командади и акъажунра хъсан нетижаяр — заланвилин 30 категориядай санлай 22 медаль къазанмишна. Шад жедай кар мадни ам я хьи, уьлкведин хкянавай командадин киседиз грекринни римлуйрин жуьреда кьуршахар кьунай къизилдин медаль гъайибурукай сад чи машгьур ватандаш Анвар Аллагьяров я. Ада 60 кг-дал къведалди заланвал авайбурун арада къизилдин медаль — дуьньядин чемпионвилин чIул къазанмишна. Аферин!
Къейд авун лазим я хьи, финалдиз акъатдалди Анвара вичин къаршидиз экъечIай са спортсмендизни гьич са баллни къазанмишдай мумкинвал ганач. Гьа гьисабдай яз ярумчух финалда Туьркиядай тир Керем Камалахъ галаз кьиле фейи бягьс 9:0 гьисабдалди акьалтIна. Финалда чи кьегьалдиз иранви Мегьди Могьсен Неджадахъ галаз вичин къуватар ахтармишун кьисмет хьана. Ахтармишна — иранвидихъ галаз бягьс 7:1 гьисабдалди акьалтIна. ИкI, Анвар Аллагьярова кесерлу и акъажунра (38:1 гьисабдалди) вири санлай 5 бягьс кьиле тухвана. Абурукай 3 лагьайтIа, вахт амаз акьалтIарна.
РикIел хкин: алай йисан сентябрдиз Сербиядин Младеновац шегьерда (ам Белграддин округдик акатзава) грекринни римлуйрин жуьреда кьуршахар кьунай международный турнирда А.Аллагьярова 60 кг-дал къведалди заланвал авай спортсменрин арада гимишдин медаль къазанмишнай. Им лагьайтIа, чи ватандашдиз дуьньядин кесерлу майданда вичин устадвал къалурдай мумкинвал гузва лагьай чIал тир. Ингье и йикъара а мумкинвиликай ада бегьерлудаказ менфят къачуна –жегьилрин арада дуьньядин чемпионвилин тIвар къазанмишуналди чи халкьдин руьгь хкажна. Адалай вилик, алай йисан майдиз, Кеферпатан Македониядин меркез Скопье шегьерда 23 йисал къведалди яш хьанвай спортсменрин арада грекринни римлуйрин жуьреда кьуршахар кьунай кьиле фейи Европадин кIвенкIвечивал патал акъажунрани Анвар Аллагьярова (60 кг — дин заланвал авайбурун арада) къизилдин медаль къазанмишнай. Финалда адаз И.Курочкин 9:0 гьисабдалди кумукьнай. Къейд авун лазим я хьи, А.Аллагьярова кIвенкIвечивал патал акъажунрани вичин къаршидиз экъечIай са спортсмендизни гьич са баллни къазанмишдай мумкинвал ганач. Чи ватандашди вири санлай кьиле тухвай бягьсер 25:0 гьисабдалди, кьве бягьсни вахт куьтягь жедалди акьалтIарнай.
Анвар Аллагьяров 2000-йисуз Ахцегьа дидедиз хьана. Буба Эдикан теклифдалди хайи хуьре А.Гъаниеван тIварунихъ галай ДЮСШ-да, гуьгъуьнлай Махачкъалада грекринни римлуйрин жуьреда кьуршахар кьунал машгъул хьана. Эхиримжи йисара ада Москвадин областдин Химки шегьердин хкянавай командадик кваз вичин устадвал къалурзава.
Нубатдин агалкьун тебрик авунихъ галаз сад хьиз, чна Анварахъ чандин мягькем сагъвал, руьгьдин мадни еке къуватар ва гележегда ам Олимпиададин чемпионвилин дережадиз хкаж хьун алхишзава!
Рагнеда Рамалданова
