«Инсаниятдин камалдин гьуьл ацIурзавай вацIарикай сад шиират я».
Муса Агьмедов
Адет яз, фагьум авай, къанажагълу ксари уьмуьрдин рекьера гьалтзавай вири дуьшуьшриз дикъетдивди фикир гуда, пис-хъсан, хийир-зиян сад-садавай айру авун патал жуьреба-жуьре дуьшуьшар, инсанрин кьилел къвезвай вакъиаяр “веревирдерин сафунай” ягъиз, чпин тежрибадин гьебедиз “уьмуьрдин тарсарин” бегьер кIватIда. Сифте жуваз, ахпа масабуруз, иллаки акьалтзавай несилриз менфят хьун патал. Герек ата-бубайрин хъсан крариз несилри кIур тагудайвал, абурун хъсан ерийрилай чешне къачудайвал, гьа са вахтунда къайгъусуз ксар цIуьдгъуьнай чкайрал алукь тийидайвал, абурун гъалатIар, нукьсанар тикрар тийидайвал.
Гьа ихьтин “уьмуьрдин тарсарин” бегьер шииратдалди несилрал агакьариз алахънавай ксарикай сад Сулейман-Стальский райондин Ивигрин хуьряй тир муаллим, “образованидин агъсакъал” Мирзабегов Амираслан Гьемзебегович я. Адан уьмуьрдин ва кIвалахдин рекьикай “ЛГ”-дин алай йисан 30-нумрада Гьажи Къазиеван макъала чапнавай.
Къе чна газет кIелзавайбур А.Мирзабегован алакьунрин маса терефдихъ — шаирвилихъ галаз танишарзава. (Шиирар сайтдин «Эдебият» рубрикадай кIелиз жеда).
Чи мухбир
