Коррупциядиз — женг!
(Эвел — 2021-йисан 48, 2022-йисан 3-нумрайра)
Инал рикIел хкиз кIанзава: гьа и кар аннамишай Имам Яралиева, вич СтIал Сулейманан райондин регьбервиле хкягъайла, школайрин кIвалах дибдай хъсанарун эвелимжи нубатдин везифайрик кутунай. Районда образованидин хел вилик тухун, лап хъсандиз кIелзавай аялар, кIвалахда тафаватлу жезвай муаллимар руьгьламишун патал Имам Яралиева мердвилелди вичин жибиндай харжзавай. Ада школайра тербиядин кIвалах, иллаки халкьдин культура, адетар аялриз чирун хъсанарун истемишна.
Вичин кIвалахдай чка дегиш жедайла, М.Яралиева райондин регьбервиле намуслу, арифдар, илимрин кандидат Нариман Абдулмуталибов теклифун дуьшуьшдин кар тушир. Адахъ, ДГУ-дин муаллимвиле кIвалахуналди, педагогвилин, республикадин, райондин гьукумдин къурулушра къуллугърал хьуналди, идара авунин тежриба хьанвай.
Райондин муаллимри тестикьарзавайвал, Н.Абдулмуталибов абуру чпин багъри инсан хьиз, гьар мус хьайитIани мектебриз, муаллимриз куьмек гуз гьазур кас яз кьабулзава. РД-дин Халкьдин Собранидин депутат, машгьур общественный деятель Имам Яралиева райондин образованидин, культурадин хилериз алай вахтунда мадни гзаф куьмек гузва. Халкьдин, уьлкведин агалкьунар, гележег мектебда кIвалахзавай муаллимдилай хейлин аслу я эхир. Идахъ галаз сад хьиз, хуьрера, идарайра коррупция нагьакьан, кьацIай кар яз (къе тахьайтIа, пака хьайитIани) такIан жедай гьалар арадал гъун мектебда гузвай тербиядилай гзаф аслу жезва.
А карди шадвал кутазва хьи, гьам хайи хуьрера чкайрал, гьамни уьлкведин меркезда ва маса регионра яшамиш жезвай девлетлуйри чпин районар вилик тухуник лайихлу пай кутазва. Школаяр, аялрин бахчаяр, спортзалар эцигиз, хуьрер аваданламишиз мердвилелди куьмекар гузва. И карди абур баркаллу, лайихлу инсанар, халис ватанпересар тирдалай гъейри, райондин руководстводиз ихтибар ийизвайдакай, тереф хуьзвайдакай шагьидвалзава. Абур инанмиш я: чпи райондиз ахъайзавай миллионралди инвестицияр ина чуьнуьхзавач. Коррупциядикай рахайтIа, СтIал Сулейманан район республикада ришветчивиликай, гекъигайла, михьибурукай сад яз гьисабзава.
Районда адахъ галаз женг республикадин “РД-да коррупциядиз акси женгинин гьакъиндай” госпрограммадин сергьятра аваз комплексни къайдада тухузва. Идахъ галаз сад хьиз, райондин вичин программани ава. Тайинарнавай вири серенжемар тухузва.
— Коррупциядиз акси серенжемри, гьелбетда, хъсан нетижа гузва, — лугьузва Агъа СтIал-Къазмайрин юкьван школадин директор, тарихдин илимрин кандидат Жабраил Асланова.- Ам негь авуниз, терг хьуниз чи районда руководстводин истемишунралди дериндай килигзава. Ина кар алайди тербиядин месэла я. Чун вири халис ватанпересар, гьахълувилин терефдарар тахьанмаз, коррупция терг ийиз жедач. Гьавиляй чна акьалтзавай несил ватанпересар яз тербияламишунин карда ришветчивал арадай акъудун кьилин шартIарикай сад яз гьисабзава.
Абдулафис Исмаилов
