Къаравушдин хъсан амал
Са сеферда Пайгъамбардин юлдаш Аишади (вичелай Аллагь рази хьурай) къаравуш къачуна ва и вахтунда Жабраил малаик эвичlна (вичелай Аллагь рази хьурай), Пайгъамбардиз лагьана: “Эй, Мугьаммад , и къаравуш дишегьли жуван кlваляй акъуд, гьакъикъат лагьайтlа, ам жегьеннемдин агьалийрикай я”. Аишади (вичелай Аллагь рази хьурай) ам ахъайна ва адаз са тlимил хурмаяр гана. Дишегьли хъфена. Рекье ада хурмайрин са пай тlуьна, амукьайбур са кесибдив вахкана. И чlавуз мадни Жабраил малаик (вичелай Аллагь рази хьурай) цаварилай эвичlна ва лагьана: “Эй Мугьаммад , гьакъикъатда виридалайни Чlехи Аллагьди ваз а къаравуш элкъуьрна хкун буйругъзава. Ада хурмайрин са пай садакьа яз гуниз килигна, Аллагьди ам жегьеннемдин цlукай азаднава”.
Алвер гьахълуди хьун герек я
Са сеферда Висиля бин аль-Аска (вичелай Аллагь рази хьурай) алай чкадал са касди масадаз пуд виш диргьемдихъ вичин деве маса гузвай. Сифтедай Василяди и кардиз фикир ганвачир, амма ахпа абур галайвал фена ва икl лугьуз гьарайна: “Гьей, вуна ам як патал маса къачунвани, тахьайтlа, адал акьахна фин патал?” Атlада лагьана: “Акьахна фин патал”. И чlавуз Василяди хълагьна: “Заз адан тапацда тlеквен аваз акуна, гьавиляй адавай яргъалди физ жедач”. И гафарилай кьулухъ муьштериди деве элкъуьр хъувуна ва маса гузвайда адав виш диргьем вахкана. Ада Василядиз лагьана: “Къуй ви тахсирдилай Аллагьди гъил къачурай, вуна зи алвер чlурна!”. Василяди жаваб гана: “Гьакъикъатда чна Аллагьдин Илчидиз (вичелай Аллагь рази хьурай) чи патай муькуь мусурманриз сидкьивал къалурда лагьана, кьин кьунвайди я”, гьакlни ада рикlел хкана хьи, вичиз Аллагьдин Илчиди (вичелай Аллагь рази хьурай) икl лугьудайла ван хьана: “Квай нукьсанар къалур тавуна, метягь маса гудай ихтиярар садазни авач, гьакlни и кардикай хабар авай касдизни кисна акъваздай ихтиярар авач” (Аль-Гьаким).
Вязини таъсирна
Пайгъамбарди суварин капl авурдалай кьулухъ, Билал асгьабдихъ (вичелай Аллагь рази хьурай) гъил агалдуналди, инсанриз вяз кlелна, абуруз Аллагьдихъай кичlе хьуниз эверна. Ахпа, дишегьлийрин терефдихъ элкъвена, абур патал вяз кlелна ва лагьана: “Куьне садакьаяр це, квекай гзафбур заз жегьеннемдин цlа кузвайбур хьиз аквазва”. И чlавуз дишегьлийрикай сада хабар кьуна: “Эй Аллагьдин Илчи , вуч себебдалди?”. Адаз жаваб гуналди, икl лагьана: “Куьне гзаф шикаятар авуниз килигна, квез итимрин патай регьим бес жезвач, итимди гьикьван къазанмишайтlани, квез ам тIимил аквазва, къадирни чир жезвач”. Идалай кьулухъ, къизилдин безекар, япагьанар ва тупlалар авай дишегьлийри, абур хутlуниз ва Билал асгьабдин (вичелай Аллагь рази хьурай) халатдин этегда эцигиз гатlунна, нетижада кесибриз паюн патал гзаф эменни кlватl хьанвай.
Гьазурайди — Куругъли Ферзалиев
