Мергьяматлу, Регьимлу Аллагьдин тIварцIелди. Аллагьдин патай салават ва салам хьурай чи Мугьаммад пайгъамбардиз, адан вири хизанриз ва диндар юлдашриз (асгьабриз).

Шукур хьурай Аллагьдиз, зун дин­дин рекье аваз, Халикьдиз ибадат ийиз гзаф йисар я. И кардихъ галаз алакъалу яз, Аллагьдин келимайрин метлеб чирунин мураддалди за Къуръ­андин урус чIалаз авунвай таржумаяр (манаяр) кIелнай. Алай вахтунда зи гъвечIи ктабханада араб чIалал кхьенвай Къуръан ва урус чIа­лалди адан манайрин таржумаяр (Н.Крачковскийдин, В.Пороховадин, М.Османован, Э.Къулиеван) ава. Абурухъ галаз санал ктабханада Къуръандин манайрин Ямин Мегьамедова лезги чIалаз авунвай таржумадини кьетIен чка кьунва.

И ктаб гъиле кьурла, зак шадвал акатна. “Эхирни чи чIалални Къуръандин манайрин таржума акъатна”, — фикирна за.

Ам неинки таржума, гьакIни баянар гузвай ктаб (тафсир) хьизни кьа­бу­лиз жеда. Лезги таржума кIелзавай кас аятрин манайрин гъавурда гьатза­ва. Ихьтин баянри ам маса таржу­май­р­илай тафаватлу ийизва. И делил лез­ги­ таржумадин лайихлувал яз гьисабиз жеда.

Къуръандин манайрин лезги чIа­лаз авунвай таржума кIелайла заз жу­ва виликдай менфят къачун тавур цIуд­ралди лезги цIийи гафар чир хьана. Заз и кар кьилиз акъуднавай Ямин гьажи Мегьамедоваз рикIин сидкьидай сагърай лугьуз кIанзава. Къуй ви­челай Аллагь рази хьурай!

Зун, РД-дин Кьилин патав гвай агъ­сакъалрин Советдин член яз, мукь­вал-мукьвал республикадин жуьреба-жуьре районрин агьалийрихъ галаз гуь­руьш­миш жезва, иллаки — Дагъустандин кьиблепата. Халкь кIватI жезвай мярекатрал зун диндин ва эдебрин бинедаллаз тербия гуниз талукь месэлаяр хкажиз алахъзава. Ихьтин гуьруьшра иштиракзавай са жерге муъ­мин ксари Ямин Мегьамедова авун­вай таржумадикай чпин фикирар ла­гьана, адан кIвалах­диз еке къимет га­на. Абуру гьисабзавайвал, таржума, чкадин алимрин фи­­кирар ва къейдер гьи­сабдиз къачуна, мадни еке тираж аваз чапдай ах­къуднайтIа хъсан жедай­.

Зи фикирдалди, лезги имамри, лезги чIалал акъатзавай “Ас-салам” газетдин векилри, Я.Мегьамедован таржума кIелна, ахтармишна, чпин къейдерикай, меслятрикай автордиз лагьанайтIа, генани хийирлу жедай. Гуьгъуьнлай, Дагъустандин Муфтиятдин разивал хьайидалай кьулухъ, ам гьа диндин идарадин къаюмвилик кваз чапдай акъудун кутугнава.

Ямин Мегьамедов “Лезги газет” кIелзавайбуруз таниш кас я. Ада хайи чIалал акъатзавай газетда кардик квай диндиз талукь рубрикадиз ма­къа­лаяр кхьизва.

Жуван макъала заз Урусатдин муфтийрин Советдин, РФ-дин мусурманрин диндин управленидин председатель Равиль Гайнутдина Къуръандин манайрин лезги чIалаз авунвай таржумадин гьакъиндай лагьанвай гафаралди акьалтIариз кIанзава: “…Араб чIал течиз, Аллагьдин керематрин метлеб хайи чIалал кьа­тIунайла, кIелзавайди метлебдиз мадни мукьва жезва ва адан бейнида вичин Халикьдин гьакъиндай зурба кIаниви­лин гьисс арадал къвезва…”

Гьасен гьажи Балатов,

РД-дин Кьилин патав гвай

агъсакъалрин Советдин член