Ви рухваяр, Дагъларин уьлкве!
Зегьметчи инсан, вичин кIвалахдин устад, гьуьрметлу хизандин кьил, ватанперес, инсанперес…Вири и гафар вичин ери-бине Мегьарамдхуьруьн райондин Ярагъ-Къазмайрин хуьре — тIебиатдин гуьрчег маканда дидедиз хьайи ва лезги халкьдин алимрин арада лайихлу чка кьунвай Магьарамов Башир Гьадисовичаз талукь я лагьайтIа, ягъалмиш жедач.
Башир вад аял авай (пуд стхани кьве вах) хуьруьн зегьметчияр тир Гьадисанни Къафият Магьарамоврин хизанда 1962-йисан 18-ноябрдиз дидедиз хьана. И хизанда чIехи хьайи вири аялри хъсан чирвилер ва тербия къачуна, гьар сад са пешедин иеси ва халкьдин арада гьуьрмет авай инсанар хьанва.
1980-йисуз хайи хуьруьн юкьван мектеб агалкьунралди акьалтIарай Башир вичин мурад кьилиз акъудунин фикирдалди, Дагъустандин хуьруьн майишатдин институтдин механизациядин факультетдик экечIна.
1986-йисуз вуз агалкьунралди куьтягьай ам Мари АССР-дин хуьруьн майишатдин техникумдиз рекье туна. Ина ада кьве йисуз муаллимвиле кIвалахна. Гуьгъуьнлай Дагъустандиз хтана ва хуьруьн майишатдин техникумда муаллим яз кIвалахиз башламишна. КIвалахдивай къерех тахьана, ада муаллимвилин пешени къачуна. 2003-йисуз “Хуьруьн майишатдин илимрин кандидат” тIварцIиз лайихлу хьана.
1998-йисалай къенин йикъалди Башир Гьадисовича Дагъустандин государстводин аграрный университетда “Технический системаяр ва рекъемрин къуллугъ” кафедрадин доцент яз кIвалахзава. Идалайни гъейри, ам пешедин рекьяй алава образованидин “Дагъустандин АПК-дин кадрийрин пешекарвал хкажунин институт” ФГБУ-да “АПК-да технический системаяр ва зегьмет хуьн” кафедрадин заведующийни я. КIвалахдин рекьяй юлдашри къейдзавайвал, Башир Магьарамов чIалан девлетлувилелди, пешедиз вафалувилелди студентриз неинки чирвилер, гьакI тербияни гуналди тафаватлу жезва.
ГьакI ада илимдин рекьяй датIана кьиле тухузвай ахтармишунри, кхьизвай материалрини пешедив гьакъисагъвилелди эгечIунин гьакъиндай шагьидвалзава. Хуьруьн майишатдин университетда кIвалахзавай йисара адан къелемдикай 130-далай артух илимдин макъалаяр, методикадин пособияр ва разработкаяр хкатнава.
2022-йисан 13-июлдиз Башир Магьарамов, “Агробиологические аспекты использования адаптивного потенциала пленчатых и голозерных сортов овса в различных почвенно-климатических условиях Республики Дагестан” темадай диссертация агалкьунралди хуьналди, хуьруьн майишатдин илимрин докторвилин тIварцIиз лайихлу хьана.
Башир Гьадисовичани уьмуьрдин юлдаш Ренади туькIвей хизанда кьве велед чIехи авуна, 4 хтул тербияламишзава.
Чна Башир Гьадисовичаз къазанмишнавай агалкьунар, гьакIни алукьзавай 60 йисан юбилей рикIин сидкьидай мубаракзава. Чи мурад рикI гьевесдив ацIанвай Башир Гьадисовичахъ сифте нубатда мягькем сагъвал, хизанда хушбахтлувал ва ада тербия гузвай студентрихъ хъсан гележег хьун, кIвалахда мадни кьакьан дережайрив агакьун я.
Жасмина Саидова
