РД-дин Кьилин везифаяр вахтуналди тамамарзавай Сергей Меликова “2020-йисан 23-октябрдиз акъудай “Дагъустан Республикадин мулкара цIийи коронавирусдин азар чукIунин вилик пад кьунин гьакъиндай алава серенжемар” 96-нумрадин къарардик дегишвилер кухтунин гьакъиндай” къарардал къул чIугуна. Идан гьакъиндай РД-дин Кьилин Администрациядин ва Гьукуматдин пресс-къуллугъди хабар гана.
Къарардик кухтунвай дегишвилерал асаслу яз, тIугъвалдихъ галаз алакъалу гьалар хъсан хъжедалди, 65 йис тамам хьанвай ва адалай чIехи яшарин ватандашар алай йисан 3-ноябрдилай 16-ноябрдалди чпи чеб чара авуниз (самоизоляция) мажбурзава. Идалайни гъейри, рикIинни дамаррин ва хкат тийизвай маса азарар квайбурузни чпи чеб чара авун меслятзава.
Къарарди инсанар машгъулардай ва маса жуьредин мярекатар тешкилзавай юридический къурулушриз абур кьиле тухун къадагъа авунва. Жемиятдиз тIуьнин къуллугъар кьилиз акъудзавай хсуси карчийриз йифен сятдин цIусадалай экуьнин ругудалди кIвалахун къадагъа я.
Къарар 2020-йисан 3-ноябрдилай къуватда гьатнава.
«Лезги газет»
