Залзаладин къурбандар
Туьркияда 30-октябрдиз хьайи залзаладикди 114-дав агакьна инсанар кьена. Идакай «REGNUM» чешмеди хабар гузва.
ЧкIай дараматрин харапIайрикай 103 кас къутармишиз алакьнава. Хасаратвилер хьайи 1035-далайни гзаф ксариз медицинадин куьмек герек хьанвай. Азарханадиз аватайбурукай 883 кас сагъ хъхьанва.
Залзаладикди хасаратвилер, барбатIвилер гзафни-гзаф Измир вилаятда хьана. Эгейский гьуьле хьайи залзала 6,6 магнитудадиз барабар тир. Грециядин островрани 6,9 магнитудадин залзала хьана. Кьилди къачуртIа, Самос островда 2 кас кьена ва 20-дал хирер хьана.
Текдиз тадач лугьузва
Туьркиядин МИД-дин кьил М.Чавушогълуди Къарабахдин къалмакъалра Анкаради Бакудиз куьмек гун давамарда лагьана. Идакай “Интерфакс” чешмеди хабар гузва.
Ада къейд авурвал, Туьркиядин президентди Азербайжан текдиз тун тавун тапшурмишнава. Идалай вилик Эрменистандин премьер-министр Н.Пашиняна Туьркияди Сириядай агъзурралди женгчияр Азербайжандиз желбзавайдакай якъин делилар авайдакай малумарнай.
Дагълух Къарабахда ислягьвилин, ягъунар акъвазарунин гьалар малумарнатIани, дяве тухузвай кьве терефдини сада муькуьдак меслят чIурунай тахсирар кутазва. Аниз Сириядай женгчияр ракъурнавайдакай октябрдин эвел кьилера хабарар раижнай.
Яваш жезвач
4-ноябрдин делилралди, дуьньяда 47 659 104 кас коронавирусдик азарлу хьана, кьейибурун кьадар 1 216 206-дав агакьнава, 34 119 865 кас сагъар хъувунва.
Чи уьлкведа тIугъвал пайда хьайидалай инихъ 1 693 454 касдик коронавирус акатна, 29 217 кас кьена, 1 266 931 — сагъ хъхьана. И рекъемар “Coronavirus-monitor.ru” сайтди раижна.
Кесиб хьана
Коронавирусдин тIугъвал себеб яз Россиядин са пай агьалийри агьвалдин жигьетдай гьалар пис хьанвайдакай малумарна. Ватандашривай хабарар кьунин махсус серенжем ОНФ-ди (Общероссийский народный фронт) тухвана.
Саки ирид агъзур россиявидин иштираквал аваз тухвай ахтармишунин серенжемдин нетижада малум хьайивал, тIугъвалдин вахтунда 66 процент агьалийрин яшайишдин гьалар дегиш хьанач. Коронавирусдин шартIара дуьньядин саки вири уьлквейра агьвал тIимил авай, кесиб инсанрин кьадар артух хьанва.
Гьабибан бармак
UFC-дин официальный туьквенда машгьур спортсмен Гьабиб Нурмегьамедова алукIзавай хьтин бармакар пайда хьанва. Маса гудай цIийи бармакар “Ufcstore” сайтди раижнава.
Гила UFC-ди халисан хипен лацу сарикай туькIуьрнавай, “UFC Papakha Khabib Nurmagomedov” тIвар алай бармакралди алвер ийиз гатIуннава. Бармакар Дагъустандин Леваша райондин ЦIудахар хуьре гьазурзава. Са бармакдин къимет 165 доллар (12 агъзур манат) я.
Эглешарзава
Белоруссиядин къайдаяр хуьдай органрин къуллугъчийри Минскдин куьчейра наразивал къалурунин серенжемра иштиракзавай агьалияр эглешариз гатIуннава. Гьукумди ихтияр таганвай серенжемра иштиракунай са шумуд кас къайдаяр хуьдай органрин къуллугъчийри кьунва.
Белоруссиядин президентдин сечкийра кандидат яз иштиракай С.Тихановскаяди умуми забастовка малумарайдалай кьулухъ, 26-октябрдиз, уьлкведа наразивилерзавайбурун цIийи лепе башламиш хьана.
США-да сечкияр
США-дин президент хкягъунин сечкийрин виликамаз чапнавай нетижайрал асаслу яз, Пенсильвания, Жоржия, Мичиган, Кеферпатан Каролина, Висконсин ва Аляска штатра гзафни-гзаф Д.Трампаз сесер ганва.
4-ноябрдин пакамахъ агакьнавай делилралди, Невада штатда демократ Жозеф Байденаз гзаф сесер хьана. “Fox New” чешмедин делилралди, Байденахъ 238 выборщик ава, Трампахъ – 213. Президентдин къуллугъдал хьунин мумкинвал кьве кандидатдихъни ава. Амма тамам делилар гьелелиг малумарнавач.
Къекъерай акъатдалди…
Китайдин са агьалиди кIвал ремонтдай чIавуз вичин кицI 100 километрдин яргъа яшамиш жезвай дустарив вахтуналди вугана. Амма иесияр галачир, таниш тушир чкада кицIивай дурум гуз хьанач. Вичин “багърияр” жагъурун патал ада 100 километрдин мензил атIана. Ажайиб хабардикай “Jianghai Evening News” чешмеди кхьизва.
Кьуд варз алатайдалай кьулухъ иесийриз чпин кицI гел галачиз квахьнавайдакай хабар хьана. Къекъведай кьван къекъерай акъатна, кицI яхун ва кьецIи гьалдиз атанвай. Ам акурбуру соцсетрин куьмекдалди гьасятда иесияр жагъурна.
«Лезги газет»
