Алатай гьафтеда Дербент райондин Белиждин аялрин искусствойрин школада 2021-2022- кIелунин йисара музыкадин ва хореографиядин отделенийра чирвилер къачузвайбурун гьахъ-гьисабдин концерт хьана. Ана аялри чпин алакьунар устадвилелди къалурна. Мярекатдин макьсад бажарагъ авай аялар дуьздал акъудун, гьакI абуруз куьмекар гун, абур вилик тухун, гьевес кутун, милли авазарни кьуьлер кIанарун, абур раиж авун тир. Ана Дербент райондин культурадин отделдин начальникдин заместитель Диляра Агъаевади, Белиж поселокдин кьилин заместитель Абдулгьамид Ражабова, аялрин искусствойрин школадин директор Энвер Ибрагьимова, Белиждин аялрин яратмишунрин кIвалин директор Мамедали Агъабалаева, поселокдин школайрин директорри, и цIарарин авторди, аялрин диде-бубайри, муаллимри, чIехи классра кIелзавай аялри ва масабуру иштиракна.
Концертда фортепианодай 1-классда чирвилер къачузвай Амина Агьмадовади ва Анна Гьажимегьамедовади тамамарай В.Моцартан «Гатфарин пьеса» (муаллим — Земфира Тагьирова), музыкадин отделенида далдамрин классда чирвилер къачузвай 5-классдин ученикри — Фарид Абдулкъадирова, Загьидин Мегьамедрагьимова, Али Рамалданова, Халиф Гьажикъурбанова тамамарай «Кавказдин ритмаяр» (муаллим — Абдурагьим Абдулкъадыров) ва муаллим Рамиз Букарован гъилик кларнет ягъунин устадвал къачузвай Алмасбег Гьабибулаева ягъай “Этюд” вирида хушдиз кьабулна.
Ахпа сегьне искусствойрин школада кьуьлер чирзавай отделенидин аялрин ихтиярда туна. Милли кьве жуьредин парталар алаз сегьнедиз экъечIай школадин “Кавха” ансамблдин кьуьлердайбуру (муаллим — Сефербег Сефербегов) лап вини дережада аваз “Дагъустандин лезгинка”, “Осетинрин кьуьл” ва “Аваррин кьуьл” тамамарна. Жаван артистрин алакьунриз килигиз атанвай диде-бубайривай чпин шадвал, аялрин ва муаллимдин кIвалахдилай ийизвай разивал чуьнуьхиз жезвачир. Сагърай лугьунин лишан яз, абуру гьар са кьуьл гурлу капаралди къаршиламишна. Арайра аялри фасагьатдиз шиирарни кIелна.
Шад мярекатдал Диляра Агъаевади къейд авурвал, алай вахтунда гьукуматди акьалтзавай несил алава образованидал желб авуниз кьетIен фикир гузва. Аялриз, куьчедивай къерехна, музыкадин, искусстводин, художественный хилерай чирвилер гана, абур вини дережадин культура ва эдеб авайбур яз вердишарун чи кьилин везифа я.
— Зун куь кIвалахдилай рази я. Квехъ мадни чIехи агалкьунар хьурай! — алхишна ада, гуьгъуьнлай школадин руководстводин патай концертдин иштиракчийрив грамотаяр вахкана.
Энвер Ибрагьимова чи гадайрикайни рушарикай, шаирди тарифзавайвал, кьуьлердай лекьер хьанвайди къейдна. Муаллимриз, абурун гъилик вердишвилер къачузвай аялриз, абурун диде-бубайризни сагърай лагьана.
Заз концерт бажарагълу артистри хьиз тухвай Амина Саидовадин ва Алина Османовадин тIварарни разивилелди кьаз кIанзава. Эхирдай вирида рикIел аламукьдай шикилар яна.
Къейд. 1977-йисуз Белиж поселокда Мамедкъаладин музыкадин школадин филиал ачухна, кьве штат гана. 1993-йисалди Белижда авай филиалдин штатар 7-дав агакьна. Гьа йисуз агьалийрин, школадин руководстводин, поселокдин администрациядин тIалабуналди Дагъустандин культурадин министрди филиал музыкадин школадиз элкъуьрунин приказ акъудна. Школадиз алава штатарни хгана, санлай къачурла ина 12 муаллимди аялриз алава образованидин хилерай чирвилер гана. 2006-йисуз музыкальный школа искусстводин школадиз элкъуьрна. Им, гьелбетда, шад жедай кар тир. Амма ана и идарадиз талукь я художественный, я театральный отделенияр ачухдай штатар ганач. Эвелдай музшколада авай музыкадинни хореографиядин отделенияр къенин йикъалди амазма. Поселок къвердавай чIехи жезва, штатарни артух хьун лазим я эхир. Амма ина крар кьулу-кьулухъди физва. Гьар йисуз са-са штат тIимиларунин нетижада къе ина амайди муаллимрин 5 штат я. Республикадин кеферпата авай алава образованидин школайра 12-далай 20-дал къведалди штатар ава, Белиж поселокдин аялрин тIалабунрив икI вучиз эгечIзаватIа, кьил акъатзавач… Гьеле икьван йисара школадиз вичин дарамат авачирдакай гьич раханни ийизвач.
Умуд кутаз кIанзава хьи, школадин цIийиз тайинарнавай директорди и кимивилер арадай акъудун патал вири къуватар желбда.
Къагьриман Ибрагьимов
