ТАСС-ди хабар гузвайвал, РФ-дин Гьукуматдин Председатель Михаил Мишустинан къарардалди тIимил таъмин тир хизанра чIехи жезвай 3-7 йисарин яшда авай аялриз гун патал уьлкведин са жерге регионриз 5,6 миллиард манатдин кьадарда алава пулдин такьатар чара ийида.
Ихтилат пуд региондикай физва: Ханты-Мансийский, Ямало-Ненецкий автономиядин округар ва Дагъустан Республика. Алава пулдин такьатар чара авун и регионра винидихъ къейд авунвай пособие къачудай ихтияр авайбурун кьадар артух хьунихъ галаз алакъалу я.
РикIел хкин, 3-7 йисарин яшда авай аялриз гьар вацра пособие гудай Указ РФ-дин Президент Владимир Путина 2020-йисуз акъуднай. Пулдин кьадар хизандин шартIарилай ва регионда яшамиш хьун патал тайинарнавай агъа кIанин кьадардилай (прожиточный минимум) аслу я.
«Лезги газет»
