Чи ватанэгьлияр — гьар сана
Экономикадин илимрин кандидат, Г.Плеханован тIварцIихъ галай РЭУ-дин кафедрадин доцент, карчи Мегьамедкерим Арифович Гьажиагъаеван ери-бине Дербент райондин ЛукIарин хуьряй я.
2017-йисуз ада “Модели пошаговой оптимизации кредитного портфеля коммерческого банка” темадай диссертация хвена. Ам “Хабиб Телеком” ООО-дин крар идара ийизвай директор я. Мегьамедкерима педагогвилин хиляй Белиждин А.Исрафилован тIварцIихъ галай гимназияда кlелна. Жуьреба-жуьре рекьерай чирвилер къачунин ашкъи ва алакьунар авай жегьилди 2007-йисуз «Дуьньядин экономика» пешедай Москвадин гьукуматдин ачух университет, 2016-йисуз О.Кутафинан тIварцIихъ галай Москвадин гьукуматдин юридический университетни акьалтIарна.
2016-йисуз ада “Модели и методы оптимального управления кредитным портфелем коммерческого банка с расширенным набором критериев” тIвар алай монография чапдай акъудна. Къейд ийин, чи ватанэгьли карчивилин хиле Марк Горский тIварцIелди машгьур я.
Адан проект “Первый Мобильный” ва “Хабиб Телеком” компанийри идара ийизва. 2010-йисара Мегьамедкерим “Каскад Проф” ЧОП-дин сагьиб тир. Идалайни гъейри, ам “Торговый Городской Банк” АО-дин регьберрин кIватIалдик квай. 2017-йисуз Центробанкди и тешкилат лицензиядикай магьрумарна.
2007-йисуз муьштерийрихъ галаз кIвалахдай менеджервилин къуллугъдилай зегьметдин рехъ башламишай жегьил пешекар банкунин президентдин къуллугъдал кьван хкаж хьана.
Эхиримжи вахтара М.Гьажиагъаев недай-хъвадай суьрсетрихъ галаз алакъалу карчивилел машгъул я. И хиляй ада са жерге тешкилатар идара ийизва. 2015-йисуз недай-хъвадай суьрсетрихъ галаз алакъалу проект кардик кутуна, и рекьяй агалкьунралди карчивал давамарзава.
2019-йисуз ада мад са шумуд важиблу кам къачуна: докторвилин диссертация хуьнив, финансрин ва кредитрин къурулушриз талукь математикадин анализдин темадай кьвед лагьай ктаб кхьинив эгечIна. Къанни цlемуьжуьд йисан яшда М.Гьажиагъаева хьанвай агалкьунрал разивална акъвазун дуьз тушиз гьисабзава. Адаз мадни вини кукIушриз хкаж жедай къастар ава. Къуй абур кьилизни акъатрай!
К.Ферзалиев
