Гьар са девирда тариф, дамах авуниз лайихлу инсанар, жегьил хизанар, сусарни жедай адет я. И мукьвара медицинадин илимрин кандидатвилин тIвар къачунвай Магьмудова Гуьлнара Жамидиновна ахьтин ксарикай сад я. Адакай рахадалди вилик заз ам кьисмет хьайи СтIал Сулейманан райондин Агъа СтIалрин хуьре еке гьуьрмет авай, 55 йисуз акьалтзавай несилдиз чирвилер гайи, Ленинан, Зегьметдин Яру Пайдахдин орденрин ва медалринни грамотайрин сагьиб Магьмудов Нажмудинан хизандикай, адан веледрикай, хтулрикай са шумуд гаф лугьуз кIанзава. Гуьльнара алай вахтунда лайихлу пенсияда авай муаллим, методист Рагъиб Нажмудиновичан хтул (Наиман хва) Рамазанан свас я. КIелзавай чIавуз садаз-сад бегенмиш хьайи Магьмудов Рамазана Ремиева Гуьлнарадихъ галаз чпин кьисметар сад авуна. Абурухъ пуд аял ава. Рамазан Наимович рентгенолог я. Абур алай вахтунда Москвада яшамиш жезва, чкадин больницайра кIвалахзава.
Виликдай Магьмудов Рагъиб Нажмудиновичани за Агъа СтIалрин юкьван школада, муаллимар яз, санал кIвалахнай. Хъсан методист хьиз, дерин чирвилер ва инсанвилин къилихар авай кас я Рагъиб муаллим. Са сеферда чна, кьве дустуни, чи кIвале аялрикай ва абурун хизанрикай хабарар кьур чIавуз ада гьар садакай ихтилатнай. Медицинадин илимрин кандидатвилин тIвар къачур хтулдин свас Гуьлнарадикай Рагъиб муаллим гегьеншдиз раханай.
Гуьльнара Жамидиновнадин бине Хив райондин Хъукьварин хуьряй я. Диде-бубади чешнелудаказ тербияламишай руша, лап хъсан къиметралди кIелни, кIвалин кIвалахарни ийиз, азад вахт гъиле ктабар аваз акъудиз, алава чирвилерни къачуна.
— Гуьлнара зи хтулдин свас жедалди, адан диде Нурият вах зегьмет чIугваз кIани, хуьруьнвийрин арада гьуьрмет авай, рикI ачух дишегьли яз чидай. Гьелбетда, ихьтин дидедиз темпел руш тежедайдини заз чизвай, — ихтилат башламишнай Рагъиб муаллимди. — Гьар йисуз ял ягъиз хтайла, са мукьва-кьилийрал кьил чIугвада, вичелай алакьдай куьмекарни гуда, хийирлу меслятарни къалурда. Им лагьай чIал я хьи, вичин уьмуьрдин са кьадар вахт Москва шегьерда физватIани, ватан, ватанэгьлияр ада рикIелай ракъурзавач. Яргъал йисара Урусатда аватIани, Гуьлнара свас михьи лезги чIалалди, ширин мецелди рахада. Акьалтзавай жегьил несилни дуьз тербия, инсанвилин къадир авайбур, дуствал кIанибур хьун чи мурад тушни кьван?! «Зи рушан кIелунрал рикI алайди, гъиле гьамиша ктаб авайди я», — лагьайди тир чаз адан диде Нурият ваха. Къейдзавайвал чирвилер къачунивай ва вичин пешекарвал хкажунивай Гуьлнара свас исятдани къерех туш.
Суьгьбетдай мадни ачух хьайивал, жегьилриз амле Магьмудов Рамиз Рагъибович хъсан чешне ва вилик физ рехъ къалурдай кас я. Гаф кватай чкадал лугьун хьи, Рамиз Рагъибовични илимдал машгъул жезва. Ам фармацевтикадин илимрин кандидат, ПГНИУ-дин (Пермский государственный национальный исследовательский университет) инсандин экологиядин ва хатасузвилелди уьмуьр кьиле тухунин къайдайрин кафедрадин доцент, профессор, биологиядин затIарин (вещества) илимдинни ахтармишунрин лабораториядин заведующий, А.Фридманан тIварунихъ галай медалдин сагьиб я. Алай вахтунда чи ватанэгьлиди винидихъ тIвар кьунвай университетда тарсар гузва.
Рагъиб муаллимдин суьгьбетдай мадни малум хьайивал, юкьван школа вири вадралди акьалтIарай Гуьлнара Жамидиновна Дагъустандин госмедакадемиядик экечIна. 2014-2016-йисара ада Москвада И.М.Сеченован тIварунихъ галай клиникадин мединститутдин ординатурада нервийрин азаррин ва нейрохирургиядин кафедрада кIелунар давамарна, алай аямдин диагностикадин ва сагъарунин къайдаяр чирна. Гьа са вахтунда кафедрадин ва клиникадин кIвалахда активвилелди иштиракна.
2018-йисуз И.М.Сеченован тIварунихъ галай госмедуниверситетдин Н.В.Склифосовскийдин тIварунихъ галай клиникадин мединститутда ам медицинадин илимрин доктор, профессор Нодель Марина Романовнадин регьбервилик кваз илимдин кIвалахдив («Когнитивные и эмоциональные нарушения на разных стадиях болезни Паркинсона» темадай) эгечIна.
Г.Магьмудовадин гъиликай илимдинни ахтармишунрин рекьяй хейлин макъалаяр хкатнава (абурукай кьвед международный Scopus журналриз акъатна), кьве макъала ада международный ва Вирироссиядин илимрин конференцийрал кIелна. Гуьльнара Жамидиновна, докладчик яз, конференциядал рахуни, аспирантвилин имтигьанар ингилис чIалалди «5» къиметдалди вахкуни, ам тамам чирвилер ва алакьунар авай пешекар тирди тестикьарзава.
2023-йисан 15-ноябрдиз Москвада И.М. Сеченован тIварунихъ галай госмедуниверситетдин диссертацийрин советди, чинеба сесер гуналди, Гуьлнара Жамидиновнадиз медицинадин илимрин кандидатвилин тIвар гунин къарар кьабулна.
Къазанмишнавай агалкьун тебрик авуналди, чаз адахъ генани чIехи дережаяр, хизанда мадни хушбахтлувал хьана кIанзава.
Сажидин Саидгьасанов,
Дагъустандин халкьдин шаир
