18-июлдилай Махачкъаладин ва Стамбулдин арада гьавадай алакъа гуьнгуьна хтунва. Идакай Махачкъаладин “Уйташ” аэропортунин пресс-къуллугъди хабар гана.
РикIел хкин, Махачкъаладин ва Стамбулдин арада авиаалакъа тIегъуьн чукIунин вилик пад кьунин макьсаддалди алай йисан 22-апрелдилай акъвазарнай.
Кьве шегьердин арада гьавадай рейсер Utair компанияди 186 пассажир гьакьдай Boeing 737-800 самолетра аваз тамамарда.
“Чна пассажирриз чеб фин кIвачин хьанвай уьлкведа санитариядинни эпидемиологиядин жигьетдай кардик квай къайдайрин гьакъиндай эхиримжи хабарар виликамаз ахтармишун меслятзава”, — лугьузва “Уйташ” аэропортунин пресс-секретарь Сапура Мегьамедовади. Адан гафаралди, Дагъустандай исятда гьакIни Дубайдиз рейсер тамамарзава.
Махачкъаладай Стамбулдиз рейсинин къиметар 8375 манатдилай башламишзава. Дагъустандин аэропортунай самолет, нисинин сятдин 3-даз 10 декьикьа кIвалахайла хкаж жеда, элкъвена Стамбулдай Махачкъаладиз ам гьа йикъан нянин сятдин 6 жез 10 декьикьа амайла, рекье гьатда. Июлдин вацра Махачкъаладай рейсер анжах гьяд йикъара, августдилай лагьайтIа, саласа, хемис ва киш йикъара тамамарда, хабар гузва Utair компаниядин сайтди.
«Лезги газет»
