Фиярин дереда 5-августдиз юргъ себеб яз уьцlей чкаяр къайдадик кухтунин кlвалахар райондин депутатрин Собранидин председатель Абдулкерим Палчаева гьар юкъуз гуьзчивилик кутазва. И гьакъиндай «Лезги газетдиз» Ахцегь райондин администрациядин пресс-къуллугъди хабар гузва.
Рикlел хкин, РД-дин МЧС-дин министр Нариман Къазимегьамедован иштираквал авай совещание тухвайдалай кьулухъ, рехъ михьи хъувунин кlвалахар тамамарзавай техникада кудай затlаралди таъминарунин месэла А.Палчаева вичин хивез къачуна. И месэладин гьакъиндай А.Палчаева Фиярин хуьруьн администрациядин кьил Шамсулагь Азизовахъ, «РУ Строй» ООО-дин кьилин инженер Ренадин Азизагъаевахъ ва маса жавабдар ксарихъ галаз совещание тухвана. Анал къейд авурвал, Къурукал-Хинер рекьиз (14-16 км) мад сеферда сел атуникди техникада цадай кудай затl (топливо) агакьариз жезвач. Гьавиляй рекьер михьи хъувун патал алава техника кардик кутунин чарасузвал ава. Абдулкерим Палчаева алава хъувурвал, Ахцегь райондин центр хъвадай целди таъминарзавай цин линияр гуьнгуьна хтунин кlвалахар кьилиз акъудиз 3 югъ я.
«Лезги газет»
