Рекьерин еридин месэла гьар юкъуз рулдихъ ацукьзавайбур патал важиблуди я. Яхдиз физвайбуруз кIанзавайдини рекьера гьерекатзавайбуру къайдайрал амал авун я.

Ахцегь райондин администрациядин пресс-къуллугъди «Лезги газетдиз» хабар гайивал, районда кардик квай «ДРСУ-77» идарадин къуллугъчияр рекьер къайдадиз хкунин кIвалахрив эгечIнава. Рекьерин бязи чкаяр гегьенш хъувунин, патарив гвай участокар михьи авунин, дагълух хуьрериз физвай рекьерин чала-чухурар арадал ахкъудунин, аватнавай къванерикай азадунин кIвалахар гъиле кьунва. Къайдадикай хкатнавай и рекьериз эхиримжи вахтара ремонтдин кIвалахар саки акунвачир.

Къейдзавайвал, рекьерин гьаларал гуьзчивал тухузвай идарадихъ цIийи начальник хьайидалай кьулухъ рекьерин ери хъсанвилихъ дегиш жезва. И варз вични четинди, гзаф кьадарда къванер аватайди, живедини рекьериз зиянар гайиди хьана. Амма «ДРСУ-77» идарадин къуллугъчияр вахтунда куьмекдиз къвезвай. Гьасятда рекьер михьна, улакьрин гьерекатар гуьнгуьна хутазвай. Кьилди къачуртIа, четин месэлаяр Фиярин, Хинерин ва Къутунхърин хуьрерихъ физвай рекьера арадал атанвай.

«Лезги газет»