“Ас-Салам” газетдин — 20 йис

7-мартдиз Ахцегьа диндин гурлу межлис кьиле фена. Дагъустандин Муф­тиятдин куьмекдалди тешкилай ам лезги чIалал акъатзавай “Ас-Салам” газетдин 20 йисан юбилейдиз талукьарнавай. Мярекатда газетдин редколлегияди, активистри, диндин алимри, райондин руководстводин ва жемиятдин тешкилатрин векилри иштиракна.

Мярекат пак Къуръандин аятар ва аялрин “Хайрат” дестеди нашидар кIе­лунилай гатIунна. Гуьгъуьнлай сегьнедиз “Ас-Салам” газетдин редактор Гьасан Амаханов экъечIна.

—  Аллагьдиз шукур хьуй, чи халкьди­ мусурман диндал амал ийиз агъзур йисалайни артух я. Виликрай диндин чирвилер халкьдин арада анжах алимрин куьмекдалди (лезгийрихъ чпел дамах ийидай зурба алимар ава) раиж­за­вайтIа, гила и кар патал чи гъиле гужлу алат — “Ас-Салам” газет ава. Къуръандин сифте гаф “кIела” я. Чирвал дуьнья­да виридалайни зурба затI я. Нагагь чирвал тахьайтIа, са карни дуьздаказ вилик фидач. Чирвилер авачиз дуьз ибадат ийиз, женнет къазанмишиз жедач. “Ас-Салам” газет инсанриз гьакъикъи чирвилер гуналди ва, гьелбетда, лезги чIал хуьналди тафаватлу я, — лагьана редакторди.

Межлисдин иштиракчийриз райондин руководстводин, райсобранидин депутатрин патай “Ас-Салам” газетдин 20 йисан юбилей муниципалитетдин кьилин заместитель Роберт Гьамзаева тебрикна.

“Ас-Салам” газет кIелзавайбурал ах­гакьарунин отделдин руководитель Магьмуд Абдулкъадирова къейд авурвал, лезги чIалал акъатзавай “Ас-Салам” газет кхьинин жигьетдай 2020-йисуз Ахцегь район 1-чкадал ала. Ина диндин ­газет 800 касдал ахгакьзава.

Газетдин дустариз, районэгьлийриз газетдин юбилей мубарак авунин хуш ­келимаяр ва насигьатар лугьуз сегьнедиз Кьиб­лепатан Дагъустанда РД-дин Муфтиятдин векил, алим Гьуьсейн Гьажиев, Муфтиятдин диндиз эвер гунин хилен ­регьбер Гьуьснуьдин Ашу­ралиев, Дагъустандин культурадин лайихлу работник Гьемдуллагь гьажи Бабаев ва маса юлдашар экъечIна.

Рахунрин арада “Хайрат” дестедини Ислам Гьамидова  нашидар кIелу­нал­ди, диндин илимдин суалрикай ибарат викторина тухуналди (дуьздаказ жавабар гайибуруз ктабар пишкешзавай) ва газет кхьизвайбурун арада лотерея къу­гъуналди (бахтавар ксариз пекер чуьхуьдай машин, пылесос, як регъведай  машин ва маса шейэр акъатна) межлис мадни итижлу ва къешенг хьана. Къейд ийин хьи, лотереядай ахцегьви Гудаев Арвидаз гъве­чIи гьаждал фидай путёвка акъатна. Му­баракрай!

Дашдемир Шерифалиев