Яргъал йисарин намуслу зегьметдай ва кIвалахда агалкьунрай СтIал Сулейманан райондин хуьруьн майишатдин ва суьрсетдин управленидин начальникдин заместитель Къазиагьмед Абумислимов ва управленидин кьилин пешекар Гьамидин Абдулкъафаров Дагъустан Республикадин Гьукуматдин гьуьрметдин грамотайриз лайихлу хьана. Шабагьар абурув райондин кьил Саид Темирханова шад гьалара вахкана.
— КIандатIа район, кIандатIа регион къачун, ана агропромкомплекс, хуьруьн майишат гьи гьалда аватIа, гьадалай анин дуьзмишвал, агьалийрин яшайиш гзаф аслу я, — лугьузва райондин хуьруьн майишатдин ва суьрсетдин управленидин начальник Къазиагьмед Къазиагьмедова. – АПК-дин рекьяй чи район республикада вилик жергейра авай муниципалитетрин арада ава. И кардик чпиз гьахълудаказ райондин агропромкомплексдин, хуьруьн майишатдин дестекар лугьузвай Къазиагьмед Ярагьмедовичан ва Гьамидин Жаруллаевичан еке пай ква.
Къ.Абумислимов 1964-йисан 21-февралдиз Кьасумхуьрел дидедиз хьана. Юкьван школа акьалтIарай ам 1981-йисуз Дагъустандин политехнический институтдик экечIна, анаг 1989-йисуз «Технология консервирования» пешекарвал къачуналди акьалтIарна. Зегьметдин рехъ Кьасумхуьруьн тамарин майишатдин мижеяр хкуддай цехда инженер-технолог яз кIвалахунилай башламишна.
1997-йисан апрелдилай Къ. Абумислимова налогрин полициядин органра къуллугъна. 2008-йисалай 2012-йисалди ада СтIал Сулейманан райондин администрациядин контрольно-счетный палатадин председателдин, 2012-йисалай 2020-йисалди райадминистрациядин ГО-дин ва ЧС-дин отделдин начальникдин, 2020-йисалай 2021-йисалди УСХиП-дин начальникдин заместителвиле кIвалахна. 2023-йисан апрелдиз ам райондин УСХиП-дин начальникдин заместителвиле тайинарна.
Уьмуьрдин юлдаш Диляра Сабировнадихъ галаз Къазиагьмед Ярагьмедовича гада Эльдар ва руш Фариза уьмуьрдин шегьредал акъудна.
Гь.Абдулкъафаров 1955-йисуз Вини СтIалрин хуьре дидедиз хьана. Ада хуьруьн юкьван школа, 1979-йисуз Дагъустандин хуьруьн майишатдин институт «Агрономия» пешекарвиляй акьалтIарна. Муьжуьд вацра «Калининский» совхозда агроном-энтомолог яз кIвалахай жегьилдиз Советрин Армиядин жергейриз эвер гана. Къ. Абдулкъафарова 1981-йисалай 1983-йисалди районрин уртах «Сельхозхимия» мехотрядда агроном-агрохимик яз, гуьгъуьнлай райкомда инспектор, «Калининский» совхозда парткомдин секретарь, райадминистрацияда кьилин пешекар яз кIвалахна, Москвада высший партийный школада чирвилер артухарна.
2022-йисалай 2023-йисалди Гьамидин Жаруллаевича райондин УСХиП-дин начальникдин заместителвилин везифаяр намуслудаказ кьиле тухвана. 2024-йисан мартдилай и управленидин кьилин пешекар яз кIвалахзава.
Гьамидин Жаруллаевич низамлу 5 веледдин буба я.
Гьелбетда, гьам Къ. Абумислимован, гьам Гь. Абдулкъафарован уьмуьрдин ва зегьметдин рекьерикай, хуьрера ва санлай районда гьуьрмет авай хизанрикай, низамлу, гьар са пешедин иесияр тир веледрикай яргъалди рахаз жеда.
— Гьамидин Жаруллаевичакай ва Къазиагьмед Ярагьмедовичакай завай разивилин гзаф келимаяр лугьуз жеда, — давамарзава ихтилат УСХиП-дин начальник Къ. Къазиагьмедова. Эхиримжи 10-15 йисан къене районда агропромышленный комплекс хейлин вилик фенва. Адак хуьруьн майишатдин 24 кархана, 2 СПОК, лежбервилинни фермервилин 40 майишат, 960 арендатор ва кьилдин ксарин 20 320-далай виниз майишатар акатзава. Абуру кIвалахзава, районда инвестицийрин проектар уьмуьрдиз кечирмишзава. Тек са 2020-2023-йисара районда 1800 гектарда цIийи багълар, 557 гектарда уьзуьмлухар кутуна, 3500 гектардин багълара ва 500 гектардилай виниз уьзуьмлухра стIал-стIал яд гудай къайда кардик кутунва. Вири и агалкьунрик Гьамидин Жаруллаевичан ва Къазиагьмед Ярагьмедовичан еке пай ква.
Районда АПК вилик финикай, инвестицийрин проектар кардик кутуникай, гележегдин везифайрикай чна Къ. Абумислимовахъ ва Гь. Абдулкъафаровахъ галазни ихтилатар авуна. Абуру лагьайвал, хуьруьн майишатдин метлеб авай чилер тамамвилелди ишлемишунай, багълар кутунай, инвестпроектар уьмуьрдиз кечирмишунай район РД-да вилик жергейра ава.
Районда йисалай-суз гьасилзавай продукциядин кьадар артух жезва. ИкI, шаз районда 2156 тонн техил, 20 276 тонн ципицIар, 40 086 тонн емишар, 31 967 тонн салан майваяр, 6171 тонн картуфар кIватI хъувуна, 4215 тонн як, 15 946 тонн нек гьасилна. Вири и рекъемар вилик йисаринбурулай гзаф я.
— Къазиагьмед Ярагьмедович ва Гьамидин Жаруллаевич хьтин пешекарри кIвалахзавай чи управленидихъ ва санлай райондихъ АПК-дин хиле гележегда мадни еке агалкьунар жедайдахъ чун инанмиш я, — лагьана Къ. Къазиагьмедова. — Хуьруьн майишатдин тежрибалу пешекарар тир абуруз чна баркалла ва аферин лугьузва.
Хазран Кьасумов
