22-январдиз Дагъустандин Кьил Сергей Меликова Москва шегьерда авай вузра кIелзавай дагъустанви студентрин тешкилатрин векилрихъ галаз гуьруьш кьиле тухвана.
«Зун Москвада Дагъустандин жегьилрин икьван чIехи векилхана хьунал шад я. Куьне уьлкведин кьилин ва кесерлу вузра кIелунал за дамахзава. Чирвилер къачудай къаст хьун вири девирра жемият вилик финин бине ва агалкьунрин куьлег яз гьисабзавай», — лагьана С.Меликова, гуьруьшдин иштиракчийрихъ элкъвена.
Къейд ийин хьи, Москвада вузра кIелзавай дагъустанви студентри республикади уьлкведин меркезда тешкилзавай мярекатра активнидаказ иштиракзава, чпелай алакьдай куьмекар гузва. Мисал яз, Р.Гьамзатован 100 йисан юбилейдин мярекатар, ВДНХ-да Дагъустандин йикъан сергьятра аваз кьиле тухвай серенжемар, ифтарар тешкилуник абуру еке пай кутуна.
С.Меликова хъсан агалкьунар авай са жерге студентрив разивилин чарарни рикIел аламукьдай савкьатар вахкана ва абуруз Москвада Дагъустандин девлетлу меденият гегьенш къатариз раиж авунин карда иштиракунай сагърай лагьана.
* * *
23-январдиз Сергей Меликова РФ-дин сенаторрихъ ва Федеральный Собранидин Федерациядин Советдин Аппаратдин векилрихъ галаз кьиле фейи совещанида иштиракна. Анал алатай йисан сентябрдин вацра «Урусатдин тарихдинни медениятдин ирс» лишандик кваз Дагъустанда кьиле фейи парламентдин форумдал кьабулай къарарар кьилиз акъудзавай гьал веревирдна.
Сергей Меликова уьлкведин дережадин форум Дагъустанда кьиле тухунин тереф хуьнай ва и жигьетдай герек тир вири шартIар тешкилай сенаторриз – Сулейман Керимовазни Ильяс Умахановаз сагърай лагьана, форум тешкилунин карда иштиракай Федерациядин Советдин Аппаратдин са жерге векилрив Дагъустандин государстводин шабагьар вахкана.
Гегьеншдиз РД-дин Кьилин сайтдай кIелиз жеда.
Чи мухбир
