Махачкъалада вечрен какаяр, туьквенрив гекъигайла, ужуз къиметдай маса гудай чкаяр кардик кутунва. Абур Дагъустандин промышленностдин ва алишверишдин министерстводи республикадин меркездин администрациядихъ галаз санал арадал гъанва.
РД-дин хуьруьн майишатдин ва недай суьрсетдин министерстводин телеграм-каналди къейдзавайвал, меркездин пуд районда кардик кутунвай и чкайра 30 кака 350 манатдай маса къачуз жеда. Кура-кура маса гузвай туьквенра лагьайтIа, гьа ихьтин жуьредин 30 какадин къимет 420-450 манатдиз барабар я.
Вечрен какаяр ужуз къиметдай маса гузвай чкайрин адресар: Кировский районда – Керимован куьче, 15 «б» нумрадин дарамат; Советский районда – Дзержинскийдин ва Ляхован куьчеяр сад-садал гьалтзавай чка («Студенческий» гастроном); Ленинский районда – I Петрдин проспект 40 «в» нумрадин дараматда авай «40 В» гастроном.
Маса хгудай ният аваз къачудай дуьшуьшрин вилик пад кьун патал, винидихъ къейднавай туьквенра какаяр маса гунин кьадардал сергьят эцигнава – са касдиз 2 кукIвадилай (лоток) артух гузвач.
«Лезги газет»
