Чи ватанэгьлияр — гьар сана

Шадвилелди къейд ийиз жедай делилрикай сад ам я хьи, эхиримжи йисара жуьреба-жуьре яратмишунрин конкурсра, кIелунра, спортда, кIвалахда агалкьунар къазанмишзавай чи ватанэгьлийрин кьадар Дагъустандани, Урусатдин регионрани, гьатта къецепатан уьлквейрани артух жезва. Интернетдин ала­къадин мумкинвилер авай къенин девирда халкьдин лайихлу, чеш­нелу инсанрикай малуматар кIватIунни, уьмуьр кьиле тухузвай чкадилай аслу тушиз, абурухъ галаз таниш хьунни четин месэла яз амукьзавач.      

И йикъара чав яргъал тир Красноярскда яшамиш жезвай, ана агалкьунралди кIвалахзавай мад са лезги жегьилдикай — Магь­мудова  Сабрина  Мураддиновнадикай  — хабар агакьна.

С.Магьмудова 1995-йисан 24-августдиз Махачкъалада дидедиз хьана. ЦIувад йис тамам же­далди Дербентда яшамиш хьана, шегьердин 15-нумрадин мектебда агалкьунралди кIелна. 2011-йисуз кьисметди Красноярск шегьердиз акъудай руша 1-нумрадин “Универс” гимназияда кIелун давамар хъувуна. Анаг куь­тягьайдалай кьулухъ ам РФ-дин МВД-дин Сибирдин юридический институтдик экечIна.

РикI алай пешедай кьилин об­разование, хъсан чирвилер къачур Сабринади вичин зегь­мет­дин рехъ РФ-дин силисдин комитетдин Красноярскдин крайдин ва Хакасия республикадин силисдин кьилин управленида къуллугъдал акъвазунилай га­тIунна. КIвалах­див пешекарвилелди, лайихлувилелди эгечIай­виляй кьве вацралай ам къуллугъдин ре­кьяй силисдин отделдин кьи­лин­ силисчидин къуллугъдал хкаж хьана. И къул­лугъ­дални ру­гуд вацра кIвала­хайдалай кьу­лухъ­ ада пешедин рекьяй агалкьунралди аттестациядин серенжемда иштиракна ва юстициядин лейтенант сад ла­гьай чин адаз вахтун­дилай фад­ гана. Агалкьунар гьеле вилик кума — адан мурад мадни вини дережаяр муь­тIуьгъарун я.

Шак алач, ихьтин гьар са жегьил тарифриз лайихлу я. Чпелай гележегдин несилрини чешне къачудайвал, къуй чи жегьил­рин арада агалкьунар, алакьунар авайбур гзаф хьурай.

Сабринадин диде Индира Бабаевнади алай вахтунда Красноярскдин В.П. Астафьеван тIвару­нихъ галай педуниверситетдин со­циально-гуманитарный технологийрин институтдин директордин заместитель яз кIвалахзава. Ам педагогикадин илимрин кандидат я.

К.Ферзалиев