Хасавюрт райондин Къурушрин хуьряй Россиядин Яракьлу Къуватрин жергейра вишев агакьна офицерри къуллугъзава. Гьабурулай чешне къачуна, военный вузра кIелзавай жегьилрини чпин чIехи бубайрин баркаллу рехъ давамарзава. Гьахьтинбурукай сад Москвада Александр Невскийдин тIварунихъ галай университетдин военный прокуратурадин факультетдин 4-курсуна кIелзавай Агъаев Агъарза Маликович я.
Агъарза 2002-йисуз дидедиз хьана, ина 2-нумрадин юкьван мектебда 4-класс куьтягьна. Юкьван школа Каспийск шегьерда “къизилдин” медалдалди акьалтIарна, гьа йисуз кIелизни фена. Агъарзади 2021, 2022-йисара 9-Майдиз уьлкведин меркездин Яру майдандал кьиле тухузвай Параддани иштиракна.
КIелунра еке агалкьунар къазанмишзавай Агъаев Агъарзадиз Дагъустан Республикадин Кьил Сергей Меликован Указдалди 2022-йисан 1-сентябрдилай махсус стипендия тайинарнава.
Агъарзадин буба Малик Майорович Каспийск шегьерда авай пограничный управленида подполковникдин чинда аваз финансрин къуллугъчи я. Диде Ширван Рамазановнадини Каспийск Морской бригадада контрактник яз къуллугъзава.
Баркалла Ватандиз къуллугъзавай виридаз!
Гьажи Къазиев
