23-июндиз Махачкъаладани­ Дербентда хьайи мусибатдин ва­къиаяр зун патал гуьзлемиш тавурбур хьана. Гьахъ лагьайтIа, рес­публикада гьалар бушарун патал са гьихьтин ятIани экстремиствилин, жемиятдиз аксивилин алахъу­нар ийиз кIанзавайбур авач лагьа­на тестикьариз жедачир. Амма динрив акI эгечIун, чIуру къастуналди пак чкайрал гьужум авун — ибур кьиле гьакьдай крар туш. Кешиш, азарлу агьил, яна кьиникь муртад, алчах тахсиркарвал я. Дербентда, пуд диндин пак шегьерда. Мусурманар, чувудар, хашпараяр асирралди ислягьвилелди, дуствилелди яшамиш жезвай, диндин суварриз сад-садан мугьманвилиз физвай шегьерда. ЮНЕСКО-ди дуьньяда виридалайни миллетперес шегьер яз гьисабнавай къадим Дербентда. Аквазвайвал, террористар патал пак чкаяр, паквилер авач.

Боевикри Дербентдани Махачкъалада синагогадални килисадал гьужумуникди полицейскияр ва ислягь агьалияр кьена. Респуб­лика ясда гьатна. Террористар тергна.

«Пак Троицадин юкъуз диндин объектрал террориствилин гьерекатар кьиле тухвай бандитрин, террористрин, инсансузрин хура­ акъвазайбур чи полицейскияр хьана. Са шумуд йис идалай вилик хьиз, чпин чанарилайни гъил къачуна, террориствилин гьужумрикай гьабуру хвена чи республикадин агьалияр, мугьманар», — лагьана РД-дин Кьил Сергей Меликова, дагъустанвийрихъ элкъвена.

Диндин идарайрал гьужумунин­ макьсаддикай рахадайла, Сергей­ Алимовича гьахълу фикир лагьана: «Инсансузри сифте нубатда халкьдин арада гъулгъула тваз, ин­санриз кичIерар гуз хьуник умуд кутунвай. Дагъустанвийрин патай абуруз ихьтин кар аквадач. За вирибуруз секинвал хуьниз эвер гузва».

Секинвал хуьзва, кичIевал, гъулгъула садакни акатнавач. Инсанри телеф хьайибурун хизанриз, багърийриз башсагълугъвал гузва. Полициядин къуллугъчийрин гьерекатар абуру гьунаррив барабарзава. Гьич чин тийидай инсанрин уьмуьр хуьналди, чпин жегьил чанар къурбанд авун бес гьунар тушни? Амма ватандашрин чинрик пашманвал ква.

Махачкъаладани Дербентда хьайи терактра рагъакIидай патан махсус къуллугърин гел аквазвай Сергей Меликов гьахъ я.

Фикир це садра: инсанар телеф авур, абуруз гъам, азаб гайи терактар низ герекзава? ЧIулав къуват­ри ихьтин гьерекатрикди гьалар пайгарсуз хьун, динрин арада къал тун, аксивилин серенжемар ва ватандашар полициядин къуллугъчийрихъ галаз ягъунриз акъатун вилив хуьзвай. Кьилиз акъатнач. Акси яз, инсанар сад хьана. Агьалийри республикадин кьиле авайбурун сиясатдин тереф хуьзва.

Ватандашриз терактар психика чIур хьанвай зомбийриз элкъвенвай фанатикри авурди чизва. Террорис­тар, за фикирзавайвал, таъмин тир, са эксиквални авачир хизанра чIехи хьана. Са игьтияжни авачиз, абуру уьмуьрдин вири няметар ишлемишзавай. Гьар гьикI ятIани, руьгьдинни идеологиядин къуватдин игьтияж аваз хьана абурухъ.

Абдулафис Исмаилов