Мегьарамдхуьруьн райондин ЦIийи Гъепцегьрин ва КьепIир-Къазмайрин хуьрера тренер-муаллим, джиу-джитсудай дуьньядин са шумудра чемпион Эйнар Экберовахъ вичихъ хьиз, адан гъилик устадвал хкажзавай гъвечIи пагьливанрихъни хъсан нетижаяр жезвайдакай чна газетда мукьвал-мукьвал чапзава.
ИкI, и йикъара Краснодардин крайдин Лермонтово хуьре какахьай единоборствойрай дуьньядин Кубок патал дуьньядин 5 уьлкведай тир 20 командадик кваз 400-далай виниз спортсменри чпин устадвал къалурна. Дагъустандин хкянавай командадик кваз ана иштиракай, Э.Экберован гъилик устадвал хкажзавай Балафенди Агьмедова (65 кг-дин заланвал авайбурун арада) ва Тамерлан Набиева (64 кг-дин заланвал авайбурун арада) ММА-дай ва грэпплингдай, Имам Абдулгьалимова (71 кг-дин заланвал авайбурун арада) грэпплингдай 1-чкаяр кьуна.
Къуй жаванрихъ ва тренер-муаллимдихъ инлай кьулухъни еке агалкьунар хьурай!
Чи мухбир
