Ингье 2025-йисан кIуьд лагьай варз тир сентябрни акъатзава. СтIал Сулейманан районда рекьер къайдадиз гъунин, куьчеяр дуьзмишунин жигьетдай капитальный эцигунрин управлениди гьихьтин кIвалахар кьиле тухванва, пландик хъийидай вуч кIвалахар кума?
И месэладиз талукь са шумуд суал чи газетдин штатдик квачир мухбир Хазран Кьасумова муниципалитетдин администрациядин УКС-дин (управление капитального строительства) начальник Роберт Лазимович Мейланован вилик эцигна.
– Роберт Лазимович, куьчейра къир цунин кIвалахар шумуд хуьре кьиле тухванва? Сифте нубатда къир цазвай куьчеяр гьибур я?
— Сифтедай лугьуз кIанзава хьи, куьчейра къир «Зи Дагъустан — зи рекьер» проектдай ва райондин рекьерин фондунин гьисабдай цазва. 2025-йисуз 12 хуьруьн 14 куьчеда къир цун планламишнава. Са шумуд куьчеда и кIвалахар акьалтIарнава. Къир цунин кIвалахар давамарзава.
И йикъара Эминхуьре СтIал Мусаибан тIварунихъ галай куьчеда къир цана. Къир цунин ва дуьзмишунин кIвалахар сифте нубатда СВО-дин иштиракчияр ва абурун хизанар яшамиш жезвай, гьакIни социальный объектар авай куьчейра тамамарзава.
Алай вахтунда Кьасумхуьрел Хивдиз физвай рекьин къекъуьндилай Кьасумхуьруьн консервиярдай заводдив кьван мензилда рекьин къерех тирвал тротуар туькIуьрзава.
– Малум тирвал, гзаф хуьрера рекьериз, куьчейриз хирхем вегьинин, дуьзарунин кIвалахарни кьиле тухузва. И жигьетдай вуч лугьуз жеда?
— Гьелбетда, санал са шумуд хуьре игьтияж авай вири куьчейра къир цадай мумкинвал райондихъ авач. И кIвалахар кура-кура гуьгъуьнин йисара ийида.
ЦIи Уллу-Гъетягърин, Испикрин, Шихидхуьруьн, Цмуррин АСП-рик акатзавай са шумуд хуьре куьчейриз хирхем вегьена, анагар дуьзарна, къайдадиз гъана. И кIвалахарни давамарда.
Чи управлениди тухванвай кIвалахрикай рахадайла, ЦIийи Макьарин, ДаркIуш-Къазмайрин ва Испикрин школайрин вилик квай рекьерани куьчейра инсанар элячIдай чкаяр туькIуьрайдини къейд ийиз кIанзава. Винидихъ чпикай рахай хьтин кIвалахар чна йисан эхирдалди ва гуьгъуьнин йисарани кьиле тухун давамарда. Райондин кьиле авайбурун фикир чи хуьрер гуьрчегбур, рекьерни куьчеяр къулайбур ва хатасузбур авун я.
Хазран Кьасумов
