Мегьарамдхуьруьн райондин Муьгъверганрин хуьре агьалийриз медицинадин рекьяй къуллугъзавай духтуррин амбулатория кардик кваз гзаф йисар я. Сифтедай анаг фельдшервилинни акушервилин пункт тир. 1987-йисалай инихъ адакай амбулатория хьана. Алай вахтунда ина 10 касди къуллугъзава, гьа жергедай яз терапевтди, сарарин духтурди, фельдшерди, акушерди, аялрин духтурди, лаборант­ди ва масабуру.

Амбулаториядин заведующийдин везифаяр вахтуналди яз сарарин духтур  Бекеров  Расул  Серкеровича  тамамарзава. Ам До­къуз­пара райондин Миграгъ-Къазмайрин хуьряй я. 2007-2012-йисара ада ДГМА-дин стоматологиядин факультетда, 2012-2013-йисара интернатурада кlелна. Стоматологиядин сирерай дериндай кьил акъудиз алахънавай жегьил пешекар 2014-йисуз Москвада “ортопедическая стоматология” пешедай 4 вацра пешекарвилин дережа хкаждай курсара хьана. 2013-йисан ноябрдилай ада Муьгъверганрин амбулаторияда сарарин духтур яз зегьмет чlуг­вазва.

Кlвалахдилай, шартlарилай рази яз зегьмет чlугвазвай жегьилди ихтилатзавайвал, хуьруьн амбулаторияда кlвалахзаватlани, адан патав сарар сагъар хъувун патал неинки муьгъверганвияр, гьакl Мегьарамдхуьряйни, Докъузпара райондайни инсанар къвезва. Расула абуруз гьакъисагъвилелди къуллугъзава. Санлай къачурла, амбулаторияди медицинадин жигьетдай ийизвай къуллугърилай агьалийри разивалзава.

— Квехъ ина гьихьтин шартlар ава? Герек дарманралди таъмин яни? — суал гана за сарар сагъар хъувунин кlвалахдик квай Расул Бекероваз.

— Чахъ лазим тир вири шартlар ава: гьамиша яд, чимивал ва икl мад. Дарманрин патахъайни дарвал, кьитвал авач. Ина куьмек гудай ва я сагъардай мумкинвал авачир дуьшуьшра, къайда тирвал, ахьтин начагъбур чна Мегьарамдхуьруьн ЦРБ-диз ракъурзава, – лугьузва духтурди.

Къейд ийин, амбулаториядиз мугьман хьайи вахтунда ана медицинадин къуллугъ герекзавай хейлин ксар авай. И карди духтурри халкьдиз хъсандиз къуллугъзавайдан ва абурун пешекарвилиз хъсан къимет гузвайдан гьакъиндай шагьидвалзава.

Куругъли Ферзалиев