Мукьвал вахтара Сулейман-Стальский райондин Агъа Стlалрин хуьре цlийи, алай аямдин мини-футболдин майдан кардик акатда. И гьакъиндай «Лезги газетдиз» райадминистрациядин пресс-къуллугъди хабар гузва.
«Пуд булахар» тlвар алай чкадин патав, 45 метрдин яргъивал ва 25 метрдин гьяркьуьвал алай майдан вичин ери-бине Агъа Стlалрилай тир ватанэгьлидин такьатрихъ туькlуьрзава.
Алай вахтунда ина эквер ва майдандин чиле искусственный векь тунин, патарив гвай чкаяр абадунин крар кьилиз акъудзава. Майдан вири патарихъай 5 метрдин кьакьанвал авай металлдин сеткадалди кlевнава. Мукьвал йикъара кlвалахар тамамвилелди акьалтlарда.
Малумарзавайвал, спортдин майдан патал и хуьруьнвиди регьимлувилелди 3 миллион манатдив агакьна такьатар чара авунва.
«Лезги газет»
