Афгъанистандин дяведин иштиракчияр патал яшайишдин рекьяй къулай шартIар арадал гъуниз Дагъустанда кьетIен фикир гузва. Лагьана кIанда, и месэла республикадин Кьил Сергей Меликова вичин гуьзчивилик кутунва. 15-февралдиз Махачкъалада афгъанвийрихъ галаз кьиле фейи гуьруьшдал мад сеферда и месэлаяр веревирдна.
РД-дин Гьукуматдин Председателдин везифаяр вахтуналди тамамарзавай Абдулмуслим Абдулмуслимова къейд авурвал, Афгъанистандин вакъиайрин ветеранрин яшайишдин шартIар хъсанарун патал алатай йисуз региондин Кьилин тапшуругъдалди республикадин бюджетдай сифте яз алава 100 миллион манат пул чара авуна. Нетижада и макьсадриз ахъайнавай пулунин кьадарди 223,2 миллион манат тешкилна.
А.Абдулмуслимован гафаралди, эгер вилик йисара яшайишдин шартIар хъсанарун патал ветеранрив 60-70 сертификат вахкузвайтIа, алатай йисуз абурун кьадар 194-дав агакьариз алакьна.
Алай йисуз и макьсадриз чара авун патал республикадин бюджетдик 420 миллион манат кутунва. Абурукай 154,9 миллион манат федеральный бюджетдай ахъайзавай такьатар я.
“И карди чаз Афгъанистандин вакъиайрин 249 иштиракчидин яшайишдин шартIар хъсанардай мумкинвал гуда. Идалайни гъейри, женгерин вахтунда Афгъанистандин мулкарал телеф хьайибурун, дяведин гьерекатрин ветеранрин хизанриз уьмуьрлух гьар вацра гузвай такьатрин кьадар 2000-далай 10000 манатдал кьван хкажнава”, — лагьана А.Абдулмуслимова.
“Российский Союз ветеранов Афганистана” ОО-дин Дагъустанда авай тешкилатдин кьил Мегьамед Хадулаева афгъанвийрин къайгъуда хьунай республикадин руководстводиз сагърай лагьана. Ада гьакIни къейд авурвал, ветеранрин яшайишдин шартIар хъсанаруниз эхиримжи йисара чара ийизвай кьван такьатар виликдай ахъайзавачир. Вичин рахунра ада гьакIни яшайишдин шартIар хъсанарун патал гьазурнавай афгъанвийрин сиягьдик дегишвилер кухтун герек тирди къейдна. М.Хадулаеван гафаралди, къенин юкъуз ахьтин ветеранрин кьадар 450-дав агакьзава. Абур вири гьеле 2005-йисан 1-январдалди учетда акъвазнавайбур я.
«Лезги газет»
