2022-йисалай Дагъустанда “Мосты и путепроводы” программа кьилиз акъудиз эгечIзава. РД-дин Гьукуматдин Председателдин заместителдин везифаяр вахтуналди тамамарзавай Батыр Эмееван гафаралди, программадин сергьятра аваз республикада 16 муьгъ цIийикIа туькIуьр хъувуниз саки 480 миллион манат пул ахъайда.
Къейд ийин хьи, такьатар федеральный бюджетдай чара авунвай. Къведай йисуз и макьсадриз ахъайдай такьатрин кьадар 1,5 миллиарддив агакьдайвал я.
Б.Эмееван фикирдалди, Дагъустан патал и программадихъ еке метлеб ава. Санлай къачурла, республикада тахминан 1 агъзурни 500 муьгъ ава.
РикIел хкин, алатай йисуз “Лезги газетдин” Telegram-каналдиз Махачкъалада яшамиш жезвай Кьурагь райондин Ахнигрин хуьруьн агьалийрилай чар атана. Абуру Ахнигрин, Бахцугърин хуьрериз хъфин патал Кьурагь вацIал эцигнавай муьгъ чкIана гзаф вахт тирдакай ва и хуьрерин агьалийрал бубайрин ватандиз хъфидай рекье, вацIалай элячIдайла, четинвилер ацалтзавайдакай (иллаки хъуьтIуьз ва гатфариз вацIуз сел атайла) кхьенвай.
И месэладин патахъай чна Кьурагь райондин администрациядиз махсус чар рекье тунай. Анай хтай жавабдай якъин хьайивал, ихтилат физвай муьгъ 2020-йисуз эцигна акьалтIарун фикирдиз къачунвай, амма пулунин такьатар авачирвиляй эцигунрин кIвалахар вахтуналди акъвазаруниз мажбур хьана. “Ахнигрин, Бахцугърин, Цилингрин хуьрериз хъфизвай рекье вацIал муьгъ эцигна куьтягьун патал такьатар 2022-йисан бюджетдик кутадайвал я”, — кхьенвай администрациядай газетдин редакциядив агакьай чарче.
«Лезги газет»
