Къияс Межидован – 115 йис
31-мартдиз Ахцегьа Дагъустандин халкьдин писатель Къияс Межидован 115 йисан юбилейдин мярекатар шадвилин гьалара кьиле фена. Пакамахъ, кьиле райсобранидин председатель Гьажимурад Парпачев аваз, яратмишдай интеллигенциядин векилри, мугьманри, писателдин мукьва-кьилийри Къияс Межидован сурал цуьквер эцигна ва дуьаяр кIелна. Гуьгъуьнлай райондин ктабханадин кIелдайбурун залда «Дагълара тунвай рикI» лишандик кваз мярекат кьиле фена.
Ам культурадин управленидин начальникдин заместитель Сулейман Сулейманова ачухна. Сифте гаф райсобранидин председатель Гьажимурад Парпачеваз гана. Зегьметкеш, ватанперес инсанрални хайи тIебиатдал ашукь бажарагълу писателдин яратмишунрикай куьруь ихтилат авуналди, ада вичин ва «Ахцегь район» МР-дин кьил Абдул-Керим Палчаеван тIварунихъай кIватI хьанвайбур тебрикна.
Писателдин уьмуьрдинни яратмишунин рекьикай гегьенш суьгьбет и цIарарин авторди авуна:
– Лезгийрикай сифте яз Дагъустандин халкьдин писателдин тIвар къачур Къияс Межидов дидедиз хьайидалай инихъ 115 йис тамам хьанва. Рагьметлуда веси авурвал, адан сурал гъилин кап ачухнавай гуьмбет эцигнава, капалай къушари яд хъвадайвал. ИкI, вич амачирлани, ада тIебиат хуьзва. Разивилелди лугьун, гьуьрмет авунин лишан яз, Ахцегьа Къияс Межидован кIвал-усадьба ава. Адан тIварцIихъ Ахцегьа ва Махачкъалада куьчеяр янава. Хайи ватанда адаз хъсан са памятникни хкажиз хьанайтIа, мадни кутугай кар жедай…
Къияс Межидован уьмуьрдикай ва яратмишунрин ирсиникай мярекатдал чпин фикирар агъсакъал Нариман Гьажиева, Ахцегьрин край чирдай музейдин директор, райсобранидин депутат Агьмед Дагъларова, Хкемрин хуьруьн школадин дидед чIаланни литературадин муаллим Майя Ражабовади, райондин дишегьлийрин Советдин председатель Таира Муспагьовади, РУО-дин начальникдин заместитель Сафинат Мамаевади, Къ. Межидован тIварунихъ галай аялрин яратмишунрин кIвалин муаллим Валентина Агъаевади, искусствойрин школадин директор, бажарагълу художник Мегьамед-Зериф Гьажиева ва масабуру лагьана.
Писателдин мукьва-кьилийрин патай мярекатдин тешкилатчийрин, иштиракчийрин тIварцIихъ развилин келимаяр Къияс Межидован хтул Абакара лагьана.
Мярекат аялри писателдин шиирарни махар («Экуь гъетер», «Заз вун кIанда», «Вили лиферин мулкар»…) кIелуналди, РДК-дин артистри манияр лугьуналди мадни гурлу хьана. Идрис Шамхалован тIварунихъ галай халкьдин театрдин артистри пара устадвилелди тамамарай «Урусатдин цуьк» тамашадай къалурай чIук иштиракчийриз иллаки хуш хьана.
Писателдин экуь къаматдиз бахшнавай межлис культурадин управленидин начальник Къистер Гъаниевади нетижаяр кьуналди ва рикIел аламукьдай шикил ягъуналди акьалтIна.
Дашдемир Шерифалиев
