СтIал Сулейманан райондин Вини Арагърин хуьр арадал атай вахт малум туш. Ам Арагъ вацIун чапла къерехда, Кьасумхуьруьвай 5,5 километрдин яргъа мензилда, экIя хьанвай. Алай вахтунда и хуьр гадарнавайбурун сиягьда ава.
Пландин бинедаллаз 1969-йисуз анин агьалияр Кьасумхуьрел (ЦIийи поселок) куьчарна. 1970-йисалай Вини Арагъар амачирди яз гьисабзава.
Агьалияр асул гьисабдай малдарвилел ва хуьруьн майишатдин маса хилерал машгъул жезвай. Бязибур, кеспи ийиз, шегьерриз физ-хквезвай. Вини Арагърин хуьре афатар, базияр, кIарасар ва мумрачар лугьудай тухумар яшамиш хьана.
Малум тир делилралди, Дагъустан Россиядин империядик экечIдалди, и хуьр Куьре ханлухдин Хъартас магьалдик квай. Ханлух Россиядин империядик акатайдалай кьулухъ Дагъустан вилаятдин Куьре округдин Гуьне наиблухдин Татархан хуьруьн жемиятдик (общество) кваз хьана.
1886-йисан переписдин делилралди, хуьре 52 майишат ва 304 агьали (154 итим ва 150 дишегьли) авай. 1926-йисуз майишатрин кьадар 72-дав агакьнавай.
Мурад Мегьамедкеримован
«СтIал Сулейманан район: тарихдин гелерай» ктабдай.
