Чешнелу жегьилар чахъ тIимил авач. Абурукай сад Москвада яшамиш жезвай, ана сарарин духтурвиле кIвалахзавай кьурагьви Тимур Хийирбегов я.
Тимур 1994-йисан 27-мартдиз Кьурагьа дидедиз хьана. Ана 1-нумрадин мектеб лап хъсан къиметралди куьтягьна. Мектебда кIелдай йисара ам волейболдал, футболдал ва азаддаказ кьуршахар кьунал машгъул хьана. Жегьилди спортдин рекьяй Дагъустандин чемпионатрани агалкьунралди иштиракна. Мектебда кIелдай йисара ада математикадай, химиядай кьиле фейи олимпиадайра гьамиша хъсан чкаяр кьазвай. Гьам спортдин, гьам кIелунрин рекьяйни къазанмишнавай агалкьунрин гьакъиндай адахъ авай кьван дипломрини грамотайри шагьидвалзава.
Жегьилдин вилик гележегдин пеше хкягъунин месэла акъвазна. Сарарин духтур жез кIан хьайи Тимур А.И.Евдокимован тIварунихъ галай МГМСУ-дик (Московский государственный медико-стоматологический университет) экечIна. Вад йисан къене ада и вузда хъсан чирвилер къачуна. Спортни гадарнач — ам футболдай университетдин хкягъай командадик квай. Акъажунра жегьил дагъвиди вичин викIегьвал къалурзавай.
Университетдин 4-курсуна аваз, Т.Хийирбегова “Добромед” клиникада сарарин духтурдин куьмекчивиле кIвалахиз гатIунна. Са кьадар тежриба кIватIай, хъсандиз чирвилер къачур Тимура 2016-йисуз вуз куьтягьна. А чIавалай инихъ ада “Добромед” клиникада кIвалахзава.
Жегьил духтурди пешекарвилин дережа хкажуниз датIана фикир гузва. ИкI, 2016-йисуз адаз международный эстетикадин конгрессда иштиракдай шагьадатнама гана. Нетижада ада стоматологиядин рекьяй лап хъсан профессорривай алава чирвилер къачуна. Сарарин духтурдин пешедин рекьяй Тимура Россияда, гьакI къецепатан уьлквейрани конгрессра датIана иштиракзава.
2018-йисуз клиникадин 20 йисан юбилейдин мярекатдал, гьакъисагъвилелди зегьмет чIугвазвай лап хъсан къуллугъчи хьуниз килигна, Тимуран лайихлувилер медалдалди къейдна. 2018-йисуз пешекарвилин дережа мадни хкажунин мураддалди ам ЦГМА-дик экечIна. Алай вахтунда Тимур Хийирбегова “Добромед” клиникайрин сетдин пуд клиникада стоматолог, хирург-имплантолог ва ортопед яз кIвалахзава. Клиникадин сайтда Тимур Хийирбегова медицинадин рекьяй куьмек гайи хейлинбуру адаз талукь яз разивилин келимаяр кхьенва. Абуру духтурдин пешекарвилин, савадлувилин, инсанвилин, гьакъисагъвилин ва дикъетлувилин ерийриз хъсан къимет гузва.
Жегьил ватанэгьлидин хизанда руш Сафия чIехи жезва.
Алатай йисалай Тимура ординатурада кIелзава. Гележегда аспирантурадик экечIдай фикирни ава. Чазни адан мурадар кьилиз акъатна кIанзава.
Куругъли Ферзалиев
