Къе чна лезги профессор, медицинадин илимрин доктор, РФ-дин лайихлу духтур, РАЕН-дин член-корреспондент, Татарстан Республикадин вилик жергеда авай отоларинголог Алиметов Халид Аразхановичакай ихтилатда.
Х.Алиметов 1947-йисан 21-августдиз Сулейман-Стальский райондин Агъа Стlалрин хуьре дидедиз хьана. Адан аял вахтар хайи хуьре акъатна. Ина 8-классдин мектеб куьтягьайдалай кьулухъ ада Кьасумхуьруьн мектебда кlелун давамарна. 1965-йисуз ам Дагъустандин медицинадин институтдик экечlна. А чlавуз и вуз медицинадин рекьяй СССР-да лап хъсанбурукай яз гьисабзавай.
Студент вахтара Халид Алметова вичин бажарагъ еримлу авуналди, вуздин общественный уьмуьрда активдаказ иштиракна, институтдин кьилин пешекарривай медицинадин цlийи сирер чириз алахъна. Нетижада ада 1971-йисуз институт агалкьунралди акьалтlарна ва ам Мордовия АССР-диз кlвалахал рекье туна. Пуд йисуз ина кlвалахайдалай кьулухъ, алакьунар авай ва вичихъ тежрибани хьанвай пешекар-духтур Татарстандин меркездиз рекье гьатна. Ина ада 1974-1976-йисара Къазандин медицинадин институтдин къвалав гвай клиникадин ординатурада кlелна.
Кlелай йисара вичин тешкиллувилин алакьунар къалурай жегьилдикай 1976-йисуз Къазандин онкодиспансердин са отделенидин заведующий хьана. Алакьунрин дережадихъ галаз сад яз, чи ватанэгьлидин къуллугъни хкаж хьана. Икl, 1978-1981-йисара ада Къазан шегьердин РКБ-дин отоларингологический отделенидин кьилин духтур яз кlвалахна. Халид Аразхановича ина медицинадин къуллугърин ери хъсанарна, духтуррин пешекарвилин дережа хкажна.
1981-йисалай Х.Алиметова Къазандин гьукуматдин медицинадин университетдин са кафедрадин заведующий яз кlвалахзава. Гзаф йисара гьакъисагъвилелди, мукьуфдивди кlвалахуни хъсан нетижаярни арадал гъана. Лезги алимди отоларингологический азарар тайинарунин, абуру азаб гузвай инсанар сагъарунин жигьетдай цlийи къайдаяр арадал гъана. Машгьур алимди 1982-йисуз “СССР-дин изобретатель” лагьай лайихлу тlвар къачуна. Медицинадин илимрин докторвилин диссетрация ада 1995-йисуз хвена ва оториноларингологияда цlийи хел — нейровертеброларингология ачухна.
Халид Алиметов Татарстан Республикадин здравоохраненидин министерстводин къвалав гвай государстводин аккредитациядинни лицензиядин пешекар, “Российская оториноларингология” журналдин редколлегиядин векилрикай сад я.
Халид Алиметован духтурвилин рекьяй вини дережадин пешекарвал, медицинадин дерин чирвилер 1986-йисуз Татарстанда фониатриядин центраяр арадал гъидайлани герек хьана. 1992-йисалай ам КГМУ-дин оториноларингологиядин кафедрадин кьиле акъвазнава. Ада алай аямдин медицинадин кар алай месэлайриз талукь тир илимдин конференцийра ва маса мярекатра активдаказ иштиракзава.
Ватанэгьлиди гьар йисуз кьве вишев агакьна хирургиядин операцияр кьилиз акъудзава, вичин тежриба жегьил духтурризни чирзава. Ада илимрин вад кандидат гьазурна, 150-далай гзаф илимдин кlвалахар кхьена.
Лезги алимдин зегьметдизни алакьунриз Татарстанда лайихлу къимет гузва, адаз гьуьрметзава.
Чнани адаз анжах агалкьунар, чандин сагъвал алхишзава.
Куругъли Ферзалиев
