Дагъларин уьлкведихъ республикадин тIвар вири дуьньяда машгьур авур спортсменар идалай виликни хьана, исятдани ава. Мукьвара чун таниш хьайи кикбоксёр  Абдурагьман  Гьажимурадова  зурба пагьливанар чахъ, шаксуз, инлай кьулухъни жедайди субутна. Ада алатай вацран эхирра Анапада Виридуьньядин кикбоксингдин тешкилатрин Ассоциациядин гъилик кваз кьиле тухузвай международный турнирда — дуьньядин Кубок патал акъажунра 32 кг-дин заланвал авай жаванрин арада — 1- чка кьуна. Чаз чир хьайивал, и акъажунра чи ватандашди гила 4 Кубок къазанмишнава. Ибурулай гъейри, къене чIехи рикI авай чи ватандашдихъ кесерлу жуьреба-жуьре турнирра, кIвенкIвечивал патал акъажунра къазанмишнавай 40-дав агакьна медалар, гьакьван кубокар, хейлин грамотаяр ва дипломар ава. Гила галай-галайвал…

А.Гьажимурадован ери-бине Кьурагь райондин Хуьрехуьряй я. Ам 2007-йисуз Махачкъалада дидедиз хьана. Алай вахтунда ина 3-нумрадин­ лицейда 7-классда хъсан къиметар аваз кIелзава. Ада “Лидер” тIвар алай ДЦБИ-да (Дагъустандин женгинин искусствойрин центр) тренерар тир Багьаутдин ва Абдулла Амаеврин гъилик вердишвилер къачузва.

— Зи 7 йис тамам хьайи юкъуз бубади заз пишкешдин лишан яз, кикбоксингдал машгъул хьун патал зун спортзалдиз тухванай. Сифтегьан акъажунар — шегьердин кIвенкIвечивал къазанмишун патал — меркезда, — 26-нумрадин школада кьиле физвай. А чIавуз 25 кг-дин заланвал авайбурун арада за 1-чка кьунай. Руьгьламиш хьайи зун мад­ни рикI гваз тренировкайрив эгечIна, — суьгьбетзава ада.

Малум хьайивал, спортдал машгъул жезвай йисара Абдурагьмана шегьердин кIвенкIвечивал патал акъажунра — 7, Дагъустандин -7, СКФО-дин кIвенкIвечивал патал акъажунрани 7 сеферда 1-чкаяр кьуна.

Жегьил спортсмендин рикI къайдаяр авачир бягьсерал, боксдал ва футболдални ала. Спортдин и жуьрейрайни ада вичин алакьунар къалурзава. Са шумудра кIвенкIвечи чкаярни кьуна.

Анапа шегьерда кьиле фейи дуьньядин Кубок патал акъажунра 20 уьлкведай, гьа гьисабдай яз, Узбекистандай, Туьркменистандай, Украинадай, Белоруссиядай тир 1000-далай виниз спортсменри иштиракна. Дагъустандин хкянавай командадик  60-далай виниз спортсменар квай. Кикбоксингдин кьве жуьредай (кик-лайт ва лайт-контакт) кьиле фейи акъажунра лайт-контактдай анжах 6 спортсменди приздин чкаяр кьуна. Абурукай сад Абдурагьман тир.

— Кикбоксинг сифте нубатда акьул — кьатIунар, йигинвал, ахпани къуватдикай менфят къачун лазим тир спортдин жуьре я. Лайт-контакт жуьреда  спортсмен гьасирраллай шахматистдиз эл­къуьн герек я. Къуватдалди ядай ихтияр авач, я юкьвалай агъуз. И жуьредал машгъул жез эгечIай сифте йикъарилай ам заз бегенмиш хьана, гадардай хиялар авач, — кикбоксингдин сирер ачухзава чи гъвечIи ватандашди.

Дугъриданни, гьам спортдал, гьамни кIелунрал рикI хьана кIанда. И чIавуз нетижаярни хъсанбур жеда, диде-бубадикни лувар акатда. Гужуналди тренировкадиз тухуз-хкуникай са хийирни хкат тийидайди сир туш. Абдурагьманан буба Агъарагьима ихтилатзавайвал, спортдал хцин гзаф рикI ала. Гьафтеда 3 сеферда тренировкадиз физва, акъажунар вилик квай вахтунда — гьар юкъуз. Ада галатун тийижиз зегьмет чIугвазва.

— Зун гзаф аялар авай хизанда чIехи хьайиди я. Хайи хуьре спордал машгъул жедай са жуьрединни шартIар авачир. Шегьерда къулай шартIар тешкилнавай спортзалар гьар са камуна  хьуни рикIик шадвал кутазва. Гаф кватай чкадал заз са кар гьайиф чIугуналди къейд ийиз кIанзава: Абдурагьманахъ галаз спортзалда 30-далай виниз жа­ванри вердишвилер къачузва, амма чи миллетдин векилрикай мад  садни авач. Заз таниш ксари­вай ван къвезвайвал, амай секцийрани лезги аялрин кьадар тIимил я. Вучиз? Бес чна къе и кар­диз фикир тагайла, пакадин югъ, чи аялрин гележег гьихьтинди хьурай! Диде-бубайри и кардиз фикир ганайтIа, хъсан тир, — лугьузва Агъарагьим Гьажимурадова.

Эхь, аялрин патахъай диде-бубайрин хиве чIе­хи жавабдарвал ава. Амма и жавабдарвал анжах аялдин руфун тухаруналди, адал пек-партал алу­кIу­налди куьтягь хьана кIандач. Аял руьгьдин жи­гьетдай девлетлу, бедендиз къуватлу хьуниз­ни­ артух фикир гун лазим я. Аял кьепIинамаз, да­на епинамаз вердишарна кIанда, гьавайда лагьанвач бубайрин мисалда.

Къуй чи веледрикай рикIер динж хьурай. Абурухъ зурба агалкьунар, Абдурагьман хьтин кьегьал­ рухваяр ва рушарни гзаф хьун чи мурад я!

Рагнеда Рамалданова