СтIал Сулейманан райондин пресс-къуллугъди хабар гузвайвал, и йикъара районда футболдай гьар йисуз кьиле тухун хъсан адетдиз элкъвенвай спортдин серенжем — А.Жарулаеван экуь къаматдиз бахшнавай турнир — башламишнава. Райондин спортдин, туризмдин ва жегьилрин крарин рекьяй комитетди Жарулаеврин хизандихъ галаз санал тешкилнавай спортдин и серенжемда алай йисуз 16 командади иштиракда.
Адет хьанвайвал, турнир Агъа СтIалрин хуьре, А.Н.Жарулаеван тIварунихъ галай стадиондал, футбол къугъунин вири къайдайрал амал авуналди, кьиле тухузва. Ам са шумуд гьафтеда давам жеда. Сифтегьан къугъуна Ахцегьрин ва Хорежрин (Хив район) командайри чпин устадвал къалурна. Къизгъин къугъунрин нетижада 4:0 гьисабдалди “Ахцегь” команда гъалиб хьана.
Регина Семедова
