И йикъара Дагъустандин педагогвилин илимдив, санлай чи милли медениятдив чIехи магьрумвал агакьна: 84 йисан яшда аваз, машгьур алим, “Лезги газетдин” дуст, педагогикадин илимрин доктор, профессор Абдурагьман Мегьамедович Мегьамедов рагьметдиз фена.
А.М.Мегьамедов Хив райондин АрхитIрин хуьре 1936-йисан 20-ноябрдиз дидедиз хьана.
Юкьван школа, Махачкъалада ДГУ-дин тарихдинни филологиядин факультетдин урус чIалан отделение акьалтIарна, ада хайи хуьре школадин пионервожатыйвиле, урус чIаланни литературадин муаллимвиле кIвалахна.
1973-йисалай инихъ ада вичин кьисмет урус чIаланни литературадин ва сифтегьан классра аялриз чирвилер, тербия гунин методикадинни теориядин месэлаяр илимдин рекьелди ахтармишунихъ галаз алакъалу авуна. Адакай Дагъустандин муаллимрин чирвилер хкаждай институтдин къуллугъчи ва 22-нумрадин юкьван школадин урус чIаланни литературадин муаллим хьана.
1986-йисуз Абдурагьман Мегьамедовичаз Дагъустандин педагогвилин институтда педагогикадин кафедрада старший преподавателдин къуллугъ гана. Гьа инлай ада илимдин кукIушрихъни ялна. Ада Дагъустандин этнопедагогикадин, Кавказдин халкьарин этикадин ва маса хилерай дерин ахтармишунар кьиле тухвана. Студентриз “Педагогикадин умуми бинеяр”, “Тербиядин теория”, “Дидактика”, “Образованидинни педагогикадин тарих”, “Дагъустандин этнопедагогикадин къурулуш (кьетIенвилер)” предметрай лекцияр кIелна, махсус курсар тешкилна.
Адан илимдин кIвалахар илимдин журналрани газетра чапна. Хейлин макъалаяр “Лезги газетдизни” акъатна. Алимдин къелемдикай вичи ахтармишзавай илимдин хилерай кхьенвай 200-дав агакьна кIвалахар, 9 монография, маса затIар хкатна.
Абдурагьман Мегьамедовичан зегьмет адаз “РД-дин школайрин лайихлу муаллим” лагьай гьуьрметдин тIвар, маса шабагьар гуналди къейдна. Ам ДГПУ-дин диссертацийрин советдин член тир.
Алим лезги халкьдин чIалан, литературадин, хъсан адетрин, санлай чи медениятдин, намусдинни ахлакьдин къайгъудар, тежрибалу пропагандистни тир. Адан рикIик хъийидай мадни гзаф крар квай. Амма ажалди мажал гудач.
Чна рагьметлудан хизанриз, мукьва-кьилийриз, багърийриз, вири архитIвийриз башсагълугъвал гузва.
Абдурагьман Мегьамедович Мегьамедован экуь къамат чи рикIелай садрани алатдач.
“Лезги газетдин” редакциядин коллектив.
