РФ-дин Президент Владимир Путина 2017-йисан 28-августдиз гайи тапшуругъар кьилиз акъудунин сергьятра аваз РФ-дин Гьукуматдин Председателдин заместитель Александр Хлопонина Кьиблепатан Дагъустанда авай “Самурский” заказникдиз талукь яз арадал атанвай гьаларин патахъай буйругъ ганва.
“Россиядин Минстройди (М.А.Мена), Россиядин Минприродади (С.Е.Донскоя), Россиядин Минкавказди (Л.В.Кузнецова), Роснедрайри (Е.А. Киселева) Дагъустан Республикадин Гьукуматдихъ галаз санал государстводин тIебиатдин федеральный метлеб авай “Самурский” заказникдин районда гидрогеологиядин жигьетдай арадал атанвай гьалариз алава яз къимет гун ва Дербент шегьер целди таъминарун тешкилунин барадай чеб кьилиз акъудуни тIебиатдин надир комплекс тир Самурдин къадим тамуз чIуру таъсир тийидай теклифар агакьарин”, — лугьузва буйругъдин текстина.
А.Хлопонина и месэладин патахъай 15-ноябрдалди гьахъ-гьисаб авун истемишнава.
РикIел хкин, В.Путина 2017-йисан 20-июлдиз кьиле фейи миллетрин алакъайрин рекьяй Советдин заседанидин нетижайрал асаслу яз са жерге тапшуругъар ганай. Абурун сиягьда лезгийрин общественностдик ва вири халкьдик секинсузвал кутазвай лап хци месэлайрикай сад тир Самурдин тамун экосистема патал къурхулувал арадал атунихъ галаз алакъалу тапшуругъни ава.
«Лезги газет»
