Ахцегь

18-декабрдиз РД-дин Гьукуматдин Председатель Абдулпатагь Амирханов Ахцегь райондиз мугьман хьана. Адахъ гьакI ви­чин заместитель Абдулмуслим Абдулмуслимов, РД-дин экономика ва мулкар вилик тухунин рекьяй министр Руслан Алиев, “Дагсельхозстрой” ГКУ-дин директор Мегьамед Юсупов, капитальный эцигунрин Управленидин начальник Мегьамед Азизов ва масабур  галай. Абуру рай­онда кьиле физвай эцигунрин гьал ахтармишна.

Сифте нубатда райцентрадин спорткомплексдин зурба эцигунрал кьил чIу­гу­на. “Хуьруьн мулкар комплекснидаказ вилик тухун” федеральный программадай эцигзавай и чIехи объектдив 2020-йисан июндиз гатIуннай. Хкажзавай кьве мертебадин зурба дараматда 1500 касдиз чкаяр ва махсус трибунаяр галай спортдин, тренажёррин залар, душар, буфет, герек маса кабинетар, вилик квай чилелни (проектдин умуми майдан 3000 кв. метр я) баскетболдинни волейболдин майданар, ял ядай парк жеда. Подрядчикри хиве кьазвайвал, чкадин пагьливанриз анин варар 2022-йисан 1-кварталда ачухда.

Ахпа мугьманар яргъал фейи эцигунриз элкъвенвай райондин больницадин комп­лексдал фена. “Россиядин Кьиблепад” прог­раммадай гьеле 2009-йисуз башламишай и комплексдин эцигунар (подрядчик “Елена” ООО, умуми къимет тахминан 500 млн. манат я) гьар жуьре себебралди акъвазарна. Дарамат вахкунин эхиримжи вахт яз 2021-йисан сентябрь тестикьарна. Алай вахтунда эцигунар бегье­марнава, амма девирдин истемишунрив кьур багьа медтехникадалди тадаракламишиз тежезвайвиляй, ам ишлемишиз вахкунин вахт 2023-йисал хъивегьнава.

Республикадин нуфузлу делегацияди райцентрада 120 чка аваз эцигзавай цIийи школадин дараматдизни дикъет гана. Под­рядчикдин векилди къейд авурвал, цIи гатуз башламишай объект вахтунда ва хъсан ери аваз эцигзава. ХъуьтIуьн гьавайри мумкинвал гайитIа, кьве гьафтеда къавар бегьемарда. Къведай йисан кIва­лах­рин пулни программадик кутунва ва школади 2022-йисан 1-сентябрдиз аялар кьабулда.

Ахцегьа “Хуьруьн мулкар комплексни­даказ вилик тухун” программадай 60 чка авай аялрин бахчани эцигна тадаракламишзава.

А.Амирханов Луткунрин хуьре “Образование вилик тухун” госпрограммадин сер­гьятраваз 400 чка авай пуд мертебадин­ дарамат эцигзавай гьалдихъ галазни таниш хьана. Алай вахтунда ФГУП “ГВСУ № 4” ва “Капитал” ООО подрядчикри эцигунринни монтаждин кIвалахар хъсан ери аваз тамамарзава. Куьлуь-шуьлуь кIва­ла­хар квачиз, объект саки бегьем я. ЦIийи шко­ладиз фидай рекьени асфальт твазва.

“Ахцегь район” муниципалитетдин кьил Осман Абдулкеримова районэгьлийрин яшайишдин шартIар хъсанарун патал эхиримжи вахтунда кьиле тухузвай ва фи-кирдик квай крарихъ галаз РД-дин Гьукуматдин Председатель танишарна. Кьилди­ къачуртIа, уьлкведин милли проектрин­ сер­гьятра аваз цIийи школа, ЦРБ, аялрин бахча газдалди таъминарнава, анриз къвезвай рекьера къир цанва, лицензияр къачунин къайгъудик ква ва икI мад.

А.Амирханов райондин экономика вилик тухунин ва жемятдин яшайишдин шар-тIар хъсанарунин жигьетдай ийизвай крарилай рази яз амукьна. Гьа са вахтунда эцигунриз талукь са жерге нукьсанар къалурна, яшайишдин метлебдин важиблу объектар яргъал чIугур эцигунриз элкъуьн тавун патал вири нукьсанар вахтунда ва ерилудаказ туькIуьр хъувун истемишна.

Дашдемир Шерифалиев

Мегьарамдхуьр

РД-дин Гьукуматдин Председателди ­Ме­гьарамдхуьруьн райондин Уружбайрин хуьре эцигзавай 304 аялдиз чкаяр жедай школадин дараматдални кьил чIугуна. Эцигунар 2019-йисуз гъиле кьуна. Хуьруьн куьгьне школада аялри пуд сменада кIелзава. ЦIийи дарамат эцигунин метлебни са сменадал элячIун я.

А.Амирханова рикIел хкайвал, гъилевай йисан сифте кьилера эцигунар кьиле физвай гьалдихъ галаз Сергей Мели­ковни таниш хьанай. Гьавиляй ам кьетIен гуьз­чивиликни кутунва. Премьер-министр ге­лежегдин школадин мулкуниз, дараматриз килигна. Эцигунар хкажзавай подрядчикди суьгьбет авурвал, са бязи четинвилер арадал атанатIани, дарамат мукьвал вахтара эцигна куьтягьда.

ЦIийи школа ишлемишиз вахкайла, пуд смена амукьдач, аялри вири жуьредин къулайвилер, шартIар авай классра, кабинетра кIелда.

Мегьарамдхуьруьн райондин кьил Фарид Агьмедова хабар гайивал, цIийи школадин гьакъиндай республикадин сан­эпидстанцияди ва МЧС-ди разивилин къиметар ганва.

А.Амирханова кIвалахдин еришар йигинарунин, дарамат тайинарнавай вахтунда ишлемишиз вахкунин ва эцигунрин кIва­лахарни виниз тир еридинбур хьунин патахъай тагькимарна.

Чи мухбир