7-ноябрдиз Дагъустан Республикадин Гьукуматдин Председатель Абдулмуслим Абдулмуслимова “Гьажиеван тIварунихъ галай завод” АО-дин бине кутурдалай кьулухъ 90 йис тамам хьун къейд авунин шад мярекатда иштиракна. Ам Махачкъаладин М.Горькийдин тIварунихъ галай Урусрин драмтеатрда кьиле фена.
Мярекатда гьакIни РД-дин Кьилин ва Гьукуматдин Администрациядин руководитель Алексей Гьасанова, РД-дин Гьукуматдин Председателдин заместитель Ризван Гъазимегьамедова, республикадин промышленностдин ва алишверишдин министр Низам Халилова, культурадин министр Зарема Бутаевади иштиракна.
Сифте гаф рахуналди, А.Абдулмуслимова “гьажиевчийрив” республикадин Кьил Сергей Меликован патай 90 йисан юбилей тебрикунин келимаяр агакьарна.
“Им республикадин промышленностдин, гьатта вири экономикадин тарихда важиблу югъ я. Къе республикада, цIурурнавай металл кIалубра цана, герек затIар расдай сад лагьай цех кардик кутурдалай ва чугун промышленный кьадарда аваз цIуруриз башламишайдалай инихъ 90 йис тамам хьанва. Гьажиеван тIварунихъ галай завод Дагъустандин промышленностдин кIвенкIвечи кархана я. Ам Дагъустандин зурба Игит Мегьамед Имадудинович Гьажиеван тIварцIиз тамамдаказ лайихлу я.
Дяведилай гуьгъуьнин йисара заводди гегьеншдаказ ишлемишиз жедай насосар, военный ва гражданвилин гимийрин рулевой машинар акъудунин сирер чирна.
90 йис тамам хьун — им завод арадал гъайидалай кьулухъ алатнавай вахт ваъ, зегьметчи зурба коллективдин тамам девир я. Заз квез мягькем сагъвал, хъсан дуланажагъ ва зегьметдин рекье цIийи агалкьунар хьунин алхишар ийиз кIанзава”, — лагьана А.Абдулмуслимова.
Вичин нубатдай “Гьажиеван тIварунихъ галай завод” АО-дин генеральный директор Абдулвагьаб Папалашова заводдин кIвалахдиз виниз тир къимет гунай республикадин руководстводиз ва кIватI хьанвай вирибуруз чухсагъул малумарна.
“Советрин Союз чкIайдалай кьулухъ республикада, гьакIни вири уьлкведа промышленный гзаф карханайриз зарар гана. Советрин Союздин Игит Мегьамед Гьажиеван тIвар алай заводдин экономика ва коллектив чалай хуьз ва карханади вичин кIвалах давамардайвал ийиз алакьна”, — лагьана А.Папалашова.
Заводдин коллективдиз тебрикдин гафар Каспийский флотилиядин командующий Александр Пешковани лагьана.
Мярекатдин сергьятра аваз А.Абдулмуслимова “Гьажиеван тIварунихъ галай завод” АО-дин тафаватлу хьайи работникриз государстводин пишкешар гана.
Суварин мярекат Гьажиеван тIварунихъ галай заводдин тарихдикай фильмдиз килигуналди ва Дагъустандин артистри гьазурай концертдин программадалди давам хьана.
Къейд ийин, 1932-йисуз бине кутур “Гьажиеван тIварунихъ галай завод” АО насосрин продукция, нафтIадинни газдин промышленностдин арматура, ракь кутуна гьазурзавай шлангар, электрогидравликадин рулевой машинар акъудунал машгъул я. Ватандин ЧIехи дяведилай виликан йисара кархана промышленный ва хуьруьн майишатдин тадаракар ремонт авунал машгъул тир. 1942-йисан 1-декабрдиз заводдиз цин кIаникай фидай луьткведин Игит командир Мегьамед Гьажиеван тIвар гана.
Алай вахтунда заводда 555 касди кIвалахзава, 2021-йисуз производстводин кьадар 539,5 миллион манатдиз барабар хьана.
Амина Муслимова
