Ахцегь райадминистрацияда РД-дин Кьилин патав гвай агъсакъалрин Советдин семинар-совещание хьана. Ана Советдин председателдин заместитель, РФ-дин лайихлу энергетик Эседула Агьмедова, агъсакъалрин Советдин членар тир Гьасен Балатова, Багьаудин Гьасанова, машгьур академик Эмирбег Эмирбегова, Ахцегь, Рутул, Докъузпара районрин агъсакъалрин советрин председателар Къеземет Къеземетова, Эмин Эминова, Дадаш Дадашева, Ахцегь райсобранидин председатель Абдул-Керим Палчаева, СП-рин администрацийрин кьилери ва теклифнавай маса ксари иштиракна.
Ахцегь муниципалитетдин кьилин заместитель Алмас Шуаева райондин кьил Осман Абдулкеримован мецелай мугьманар тебрикна. Э.Агьмедова РД-дин Кьил В.Васильева республикадин Халкьдин Собранидиз ракъурнавай Чарче къейднавай месэлайрай агъсакъалрин Советдин кIвалахдикай гегьенш доклад авуна.
— РД-дин Кьилин патав 30-дав агакьна гьар жуьре советри кIвалахзава. Абурукай виридалайни кесерлу ва кар алайди агъсакъалрин Совет я. Адан асул везифаяр, республикадин уьмуьрдин важиблу месэлаяр веревирд авуналди, абур халкьдив агакьарун ва республикадин Кьилиз талукь тир теклиф-меслятар гун; РД-дин Кьилин сиясатдин мана-метлебдикай асантдиз гъавурда акьадай къайдада халкь хабардар авун, месэлаяр гьялун патал чкайрал агъсакъалрин советар дуьз гъавурдик кутун, активламишун я…”, — лагьана Эседула Агьмедова ва Чарче вилик эцигнавай истемишунар Кьиблепатан Дагъустандин шартIара уьмуьрдиз кечирмишунин мумкинвилерикай вичин фикирар лагьана.
Районрин ва хуьрерин агъсакъалрин советрин кIвалах дуьз тешкилуникай ва абурун алакъайрикай Гьасен Балатова гегьенш суьгьбет авуна.
Ахпа трибунадихъ чпин кIвалахдикай ва гьалтзавай бязи четинвилерикай малуматар гваз районрин агъсакъалрин советрин председателар экъечIна. Кьилди къачуртIа, Къеземет Къеземетова районда аялрин бахчаяр бес тежезвайдакай (районда 400 аял садикрин учирда ава), Рутул райондин агъсакъалрин Советдин председатель Эмин Эминова районда саларбанвал артмишун патал дигидай яд бес тежезвайдакай лагьана.
Ахпа семинар-совещание суал-жавабдин къайдада давам хьана. Докъузпара райондин ветеранрин советдин председатель Мелик Балакъадашева Яру дагъда авай Къежел, ГъвечIи ва ЧIехи яйлахрикай, сергьятдин а пата гьатна, къалажухвийривай менфят къачуз тежезвайдакай малумарна. Ахцегь райондин агъсакъалрин Советдин председатель Къардаш Мамалиева районда багълар кухтуналди, Ахцегьрин ичерин машгьурвал арадал хкун герек тирди къейдна. Мергьяматлувилин “Просвещение” фондунин президент, РД-дин лайихлу муаллим Магьмуд Абдулкеримова дагълух хуьрер газламишунин мураддалди Ахцегьай Рутулиз 25 километрдин мензилдиз газопровод чIугуник къуьн кутун тIалабна. Зегьметдин ветеран Нурудин Исмаилова Ахцегьа яргъал эцигунриз элкъвенвай ЦРБ-дин комплекс бегьемарунин ва районда девирдин истемишунрив кьур спортдворец эцигунин гьакъиндай месэлаяр къарагъарун теклифна. “Сельсовет Хрюгский” СП-дин кьил Загьидин Сулейманова райондикай хкатнавай ЦIийи Гъуьгъвез ва Усуррин хуьрериз талукь тир статус гунин (авай гьалара анра инсанривай чпин хсуси кIвалера прописка ийиз жезвач) месэла гьялиз тежезвайдакай шикаятна. Зегьметдин ветеран Керем Керемова Самур дереда ГЭС-ар эциг тавунал тажубвална ва гьасилзавай хуьруьн майишатдин суьрсет районэгьлийриз я чкадал гьялдай, я шегьеррин базарра маса гудай мумкинвал тахьуникай (вири базарар алверчийрин гъиле ава), хъвадай яд сангигиенадин ва биохимкъурулушдин жигьетдай истемишунрив кьан тийизвайвилелай наразивална. Калукви агъсакъал Гьажи Салигь бубади вичин фикирар-теклифар чарчел кхьена вугана.
Мярекатдин председатель Эседула Агьмедова суалриз жавабар гана ва къарагъарнавай месэлаяр РД-дин Кьилив ва Гьукуматдив агакьардайди хиве кьуна.
Дашдемир Шерифалиев
