21-февралдиз РД-дин Гьукуматдин Председателдин заместителдин везифаяр вахтуналди тамамарзавай Рамазан Жафарован регьбервилик кваз ВКС-дин къайдада совещание кьиле фена ва анал Донецкдинни Луганскдин Халкьдин республикайрай катзавай инсанар кьабулунин ва абур яшамиш жедай чкайралди таъминарунин месэла веревирдна.
Р. Жафарова хабар гайивал, Донецкдин ва Луганскдин Халкьдин республикайра арадал атанвай четин гьаларихъ галаз алакъалу яз анрай Ростовдин областдиз гзаф кьадарда инсанар катнава. Ростовдин областда Россиядин МЧС-дин министрдин везифаяр вахтуналди тамамарзавай Александр Чуприянов кьиле аваз федеральный оперативный десте кардик кутунва. Россиядин субъектриз катзавай агьалияр кьабулун теклифнава.
РД-дин Гьукуматди региондихъ катнавай 600 кас кьабулдай мумкинвал авайдан гьакъиндай Россиядин МЧС-дин тIварунихъ чар ракъурнава. Дагъустандин МЧС-ди ва и месэладихъ галаз алакъалу органри гьазурлухвилин кIвалах тухванва. Катзавай агьалияр кьабулуниз талукьарнавай Гьукуматдин махсус комиссиядин гьакъиндай проект гьазурнава.
Къейд ийиз кIанзава хьи, инсанар лап четин гьалара гьатнава, абур чпелай аслу тушиз катнавайбуруз элкъвенва. Гьавиляй чна абуруз республикада вири жуьредин къулай шартIар тешкилун лазим я,- лагьана Рамазан Жафарова.
Дагъустан Республикадин МЧС-дин векилри регионда ДНР-дай ва ЛНР-дай катнавайбур кьабулун патал гьихьтин кIвалах тухванватIа, гьадакай РД-дин МЧС-дин министрдин везифаяр вахтуналди тамамарзавай Нариман Къазимегьамедова лагьана. Адан гафаралди, гъиле-гъил аваз тешкилнавай ведомствойрин уртах дестеди республикадин аялрин сагъламвилин лагерар катнавайбур кьабулуниз гьазурнавай гьалдилай разивал къалурна.
Дагъустан Республикадин Гьукуматдин махсус комиссиядин членрихъ галаз веревирдер авурдалай гуьгъуьниз катнавайбур кьабулдай кьве пункт тайинарнава — Къарабудахкент районда авай аялрин сагъламвилин “Солнечный берег” ва Къайтагъ районда авай “Огонек” лагерар.
Эгер чкаяр бес тахьайтIа, Избербашдин туристрин “Прибой” ва Махачкъаладин ял ядай “Дельфин” базайрикайни менфят къачуда.
«Лезги газет»
