Аслу туширвилин тереф хвена
Россиядин Хатасузвилин Советдин заседание кьиле фейи вахтунда адан вири членри Донецкдин ва Луганскдин халкьдин республикайрин (ДНР ва ЛНР) аслу туширвал гьисаба кьунин теклифдин тереф рейсадвилелди хвена. Идакай “Россия 24” телеканалди хабар гана.
РФ-дин Президент В.Путина малумарайвал, Киевдин гьукумдарри Донбассда жаза гудай кьве операция кьилиз акъуднава. Исятда пуд лагьай сефер яз гьалар къати жезва. Президентди кьетIендаказ къейд авурвал, арадал атанвай къизгъинвилер ислягьвилелди алудун патал Россияди гьа сифтедилай мумкин тир вири жуьредин алахъунар авуна.
“Новости” РИА-ди хабар гузвайвал, Украинади гьужум авунин къурхулувал авайвиляй ДНР-дай ва ЛНР-дай дишегьлияр, аялар ва яшлу инсанар Россиядин регионриз акъудзава. Умуми мобилизация малумарнава.
Украинадин рагъэкъечIдай пата къалмакъал давам жез 8 йис я. ООН-дин делилралди, и муддатда 13 агъзур инсан къурбандриз элкъвена, саки 44 агъзур касдиз хасаратвилер хьана.
Донбассдин гьалар США-ди ва НАТО-дин муькуь уьлквейри къизгъинарзава. Абуру Украинадиз яракьар, аскерар рекье твазва. Россиядин гьукумдарри яракьар агакьарунин гьерекат акъвазарун патал са шумудра эвер ганай.
Россиядин МИД-дин кьил С.Лаврова Германиядин МИД-дин кьил А.Бербокахъ галаз телефондай рахадайла къейд авурвал, арадал атанвай муракаб гьалара Киевдин терефди къанажагълу рехъ хкягъун патал, “нормандский форматдин” иштиракчи хьуниз килигна, Германияди алахъунар авун лазим я.
“Украинадин къенепатан къалмакъал яргъалди ва дурумлудаказ пайгардик кутунин жигьетдай амукьзавай рехъ Минскдин икьрарар кьилиз акъудун я”, — хабар гана РФ-дин МИД-ди.
ЕС-ди гьелягьар кьазва
“Россия 24” телеканалдай рахадайла, РФ-дин Президент В.Путина ДНР-дин ва ЛНР-дин аслу туширвал гьисаба кьунин документрал къул чIугуна.
“РФ-дин Федеральный Собранидивай и къарар кьабулун ва кьве республикадихъ галазни дуствилин ва сада муькуьдаз куьмекар гунин гьакъиндай тир икьрар тестикьарун тIалабзава”, — лагьана В.Путина.
Идалай вилик “Новости” РИА-ди хабар гайивал, Россияди ДНР ва ЛНР аслу тушир республикаяр яз кьабулайтIа, Ж.Боррела ЕС-ди гуя “сад тир жаваб” гуда лугьуз, гьелягьар кьунай.
Евросоюзди Россиядиз ДНР-дин ва ЛНР-дин аслу туширвал гьисаба такьуниз эвер ганай. Ихьтин фикир ЕС-дин уьлквейрин МИД-рин кьилерихъ галаз Брюсселда кьиле тухвай нетижайрин заседанидал евродипломатиядин кьил Ж.Боррела малумарна. Ада, РагъакIидай пата гуя рейсадвилин къарар кьабулда лугьуз, Россиядиз къурхуяр гузва.
Россиядин регьберди талукь документрал къул чIугурдалай кьулухъ ЕС-дин ва ЕК-дин кьилери, гуя Россиядин терефди международный къайдаяр чIурна лугьуз, чи ва чпин амадагри талукь жавабар гун хиве кьунва.
Д.Медведева къейд авурвал, ДНР ва ЛНР аслу тушир республикаяр яз тестикьарайдалай кьулухъ санкцияр, къурхуяр, сиясатдин жигьетдай шупIариз алахъунин гьерекатар кьиле фида. “Ихьтин крарай чун идалай виликни акъатайди я ва кичIевилер авач, чахъ мягькем нервияр ава”, — алава хъувуна ада.
Никарагуадин президентдин фикирдалди, референдум кьиле тухвайтIа, ЛНР-дин ва ДНР-дин агьалийри Россиядик эке-чIунилай разивал ийида.
Са жерге уьлквейри (США, Британия, Канада…) тади гьалда Россиядиз акси цIийи санкцияр кардик кутун кьетIнава. Бязи уьлквейри Украинада авай чпин ватандашриз тади гьалда анай экъечIуниз эвер гузва.
Куьмек гуз гьазур я
Донбассдай катнавайбур патал Адыгеядин гьукумдарри 12 тонн недай-хъвадай няметар ва эвелимжи герек маса затIар гьазурнава. Идакай “Новости” РИА-ди хабар гузва.
Къейд ийин, чпин кIвалерай катуниз мажбур хьанвай Донбассдин агьалийриз Россиядин са жерге регионри алакьдайвал куьмекар гузва.
ТIугъвал
Коронавирусдин тIугъвал пайда хьайидалай инихъ Россияда саки 16 миллиондив агакьна ксар начагъ хьана. И девирда вирусдик чи уьлкведа 347 агъзурдалай артух агьалияр кьена. Сагъ хъхьайбурун кьадар 13 миллиондив агакьнава. Уьлкведин 2 миллионни 7 вишелай гзаф ксариз вирусдиз акси рапар янава.
Санлай дуьньяда ковиддик 426 миллиондилай гзаф ксар азарлу хьана. Вирус себеб яз, кьейибурун кьадар дуьньяда 6 миллиондив агакьнава.
Эхиримжи йикъара “омикрон” штамм гегьеншдиз чкIизватIани, адакди кьезилдаказ начагъ жезва. Гьар юкъуз азарханайра къаткурзавайбурун кьадар Россиядин сергьятра виликандалай тIимил хьанва.
Начагъ хьанвайбурун кьадардал гьалтайла, сад лагьай чкадал США, адан гуьгъуьнал Индия, Бразилия, Франция, Великобритания ва Россия ала.
«Лезги газет»
